Уыцы рæстæгмæ ма профилон куыстуаты минæвæрттæ рабæрæг кодтой, адæм сæ хæдзæрттæ хивæндæй газы хызтæм куы баиу кодтой, ахæм 640 цауы
Афæдзы райдианæй 31 мин абонентæй фылдæр райстой, газæй сæ кæй алыг кæндзысты, уый тыххæй фыстæджытæ. Уыцы рæстæгмæ ма профилон куыстуаты минæвæрттæ рабæрæг кодтой, адæм сæ хæдзæрттæ хивæндæй газы хызтæм куы баиу кодтой, ахæм 640 цауы. Хъармгæнæн сезоны фæстæ та специалисттæ сæрмагонд куыст кæнынц хæсджынтимæ. Бæлвырддæр хабæрттæ радзурдзæн Хъайтмазты Дзерассæ.
Хъармгæнæн сезоны фæстæ газы кусджытæ рацыдысты рейды – зилынц хæсджынтыл. Афæдзы райдианæй чи нæ фыста, уыцы абоненттæн æрвыст æрцыдысты, газæй сæ кæй алыг кæндзысты, уый тыххæй фыстæджытæ. Æдæппæтæй ахæм гæххæттытæ уыдысты 31 минæй фылдæр.
Ахæм фыстæджыты фæстæ 4 мин адæймаджы сæ хæс æххæстæй бафыстой, 2 мины онг бафыстой, къæпхæнгай ацы хъуыддаг кæй сæххæст кæндзысты, уый тыххæй бадзырдтæ. Поселок Южныйы хæдзары цæрджытæ дæр радтой, афæдзы дæргъы хæс бафидыны дзырд, фæлæ йæ нæ сæххæст кодтой. «Межрегионгаз»-ы кусджытæ рæстæгмæ бауырæдтой газы цыд хæдзармæ – сæвæрдтой пломбæ.
50 мин сомæй фылдæр хæс кæмæн ис, ахæм адæм республикæйы ис 10 минæй фылдæр. Нырма уал газæй лыггонд æрцыд хæсджынтæн сæ 10%-ы. Ацы куыст дарддæр æххæстгонд цæуы. Закъонмæ гæсгæ, 2 хыгъдон периоды дæргъы ресурсæн фыст куы нæ уа, уæд абоненты ис газæй алыг кæнын. Æмбалад «Дружба»-йы газы кусджытæ пломбæ сæвæрдтой хæтæлыл уынджы – хæдзары хицау газæн афæдзæй фылдæр нæ фыста.
Январæй маймæ газы кусджытæ рабæрæг кодтой, адæм сæ хæдзæрттæ хивæндæй газы хызтæм куы баиу кодтой, ахæм 640 цауы. Афтæ куы вæййы, уæд газ алыг кæнынц æхсидæны фæрцы. Цæмæй та артаг хæдзарттæм хæццæ кæна, уый тыххæй уал абонентты хъæудзæн бафидын хæс, стæй газы хæтæлты куыст сног кæнынæн хæрдзтæ.
