Мæздæджы районы Павлодольскæйы станицæйы цæрæг Роман Коробченко у программæйы фыццаг архайджытæй иу
Цæрджытæн æцæг æххуыс. Афæдзы райдианæй нæ республикæйы æххæст кæнынц мæгуырдзинадимæ тохы программæ. Йæ нысан у, фæкæсынхъуаг бинонты нымæц фæкъаддæр кæнын. Цæрджытæн программæйы фæрцы ис фарсхæцты æртæ мадзалы. Æххуыс сын кæнынц куыст ссарын, хи куыстуат байгом кæнын æмæ хæдзары чысыл фермæ саразынмæ. Мæздæджы районы Павлодольскæйы станицæйы цæрæг Роман Коробченко у программæйы фыццаг архайджытæй иу. Паддзахад ын радих кодта 250 мин сомы. Уыдонæй балхæдта сæрмагонд ифтонгарз æмæ байгом кодта техникон лæггæдты станцæ. Мæздæггæгтæ уымæй уæлдай сæхи фæлварынц маргъ æмæ фосдарынады, æлхæнынц ифтонгарз æмæ гом кæнынц æрмадзтæ æмæ ательетæ. Программæйы архайджытæ ныридæгæн систы 300 бинонтæ.
