Нейрохыз анализ кæны рæуджыты æмæ сæры магъзы компьютерон томографы хуызистытæ, иртасы 8 патологийы онг æмæ сбæрæг кæны риссаг зонæтæ
Афæдзы райдианæй Цæгат Ирыстоны аразгæ интеллекты фæрцы скодтой 43 мин иртæстытæй фылдæр. Нейрохыз анализ кæны рæуджыты æмæ сæры магъзы компьютерон томографы хуызистытæ, иртасы 8 патологийы онг æмæ сбæрæг кæны риссаг зонæтæ. Ацы системæ куыст рæвдздæр кæны, фæлæ диагноз æвæрын йæхимæ нæ исы. Бæлвырддæр радзурдзæн Хъайтмазты Дзерассæ.
Хуызистыл патологи ссарын, кæд ис, уæд… Æрæджы дæр ма аразгæ интеллект нымад уыд наукон фантастикæйыл. Абон ацы зондджын системæ æнтысджынæй фидар кæны æнæниздзинадхъахъхъæнынады къабазы. Аразгæ интеллект сси дохтырты-рентгенологты æнувыд æмбал, ныридæгæн æххуыс кæны æвзарын хъыгдардбаййафæг хæйттæ, сбæрæг сæ кæны сырх рухсытæй.
Аразгæ интеллект дохтыртæн æххуыс кæны 5 хуызы иртæстыты. Абон специалисттæн сæ бон у тагъд æмæ бæлвырд раиртасын, æрмæст риуыгуыдыры компьютерон томографийы хуызистытæ нæ, фæлæ сæры магъзы дæр. Аразгæ интеллекты хатдзæг медиктæ хонынц «æртыккаг цæстæнгас». Риуыгуыдыры иу иртæсты нейрохызæн йæ бон у рабæрæг кæнын 8 патологийы æууæлтæ.
Аразгæ интеллектæй пайда кæнынц, компьютерон томографийы иртæстытæ кæм кæнынц, æппæт уыцы медицинон кусæнуатты архайды. Сервис архайы, куыд дохтырты уынаффæтæ хæссынæн æххуысы системæ. Уыимæ зондджын системæ гæнæн патологитæ æрмæст иртасгæ кæны, диагноз сæвæрыны хъуыддаджы фæстаг ныхас вæййы дохтыртæм.
Афæдзы райдианæй Цæгат Ирыстоны аразгæ интеллекты руаджы скодтой 43 мин иртæстытæй фылдæр. Нырыккон системæйæ пайда кæнын æнтысы нацпроект «Дæргъвæтин æмæ активон цард»-ы архайды фæрцы.
