Куыстытæ æрæджыйы онг ахадгæйæ æххæстгонд цыдысты
Афæдзы размæ Ногир æмæ Михайловскæйы *хсæн цы хид ныккалд, уый арæзтад рæстæгмæ æрлæууыд. Куыстытæ æрæджыйы онг ахадгæйæ æххæстгонд цыдысты. Объекты аргъ у 780 милуан сомы, фæнд æй кæнынц афæдзы кæронмæ сцæттæ кæнын. Ацы уавæрæй чи тыхсы, уыцы адæм фæсидтысты адæмон фронты минæвæрттæм, цæмæй сын баххуыс кæной равзарын, куыстытæ цæмæн фæкъуылымпы сты, уый. Бæлвырддæр радзурдзæн Хъайтмазты Дзерассæ.
Цæугæдон гуылф кæны æмæ абухы. Йемæ та, Ногиры хид республикæйы сæйраг транспортон артери кæмæн у, уыцы адæм дæр. Рацарæзæн куыстытæ куы æрлæууыдысты, уæд районы цæрджыты мæт фæтыхджындæр.
Профилон комитеты фидарæй зæгъынц, хиды арæзтад фæуыдзæн, куыд нысангонд уыд, уыцы фæткмæ гæсгæ. Ныртæккæ куыстытæ кæй æрлæууыдысты, уымæн ис æрмæстдæр иу аххосаг. Республикæ æнхъæлмæ кæсы фæрæзтæ райсынмæ.
Цалынмæ хид нæй, уæдмæ фæндæгтыл уавæр у тыхст. Фæлæ арæзтадон организацийы дæр, æмæ транспорты æмæ фæндаггон инфраструктурæйы комитеты дæр зæгъынц, афæдзы кæронмæ фарста лыггонд æрцæудзæн.
Кæд ныртæккæ куыстыты цыд фæкъаддæр, уæддæр аразджытæ цы снысан кодтой, уыдон сæххæст кодтой. Æдæппæтæй ног хидæн уыдзæн 6 быцæуы. Ныридæгæн дзы цалдæр цæттæ сты. Пъланмæ гæсгæ, ног хид уыдзæн æрмæст фидардæр нæ, фæлæ зæрондæй нырыккондæр. Базилдзысты территоримæ дæр.
Хиды арæзтад фæуын, æмæ Дзæуджыхъæуы уынгты транспорты цыд фæкъаддæр кæнын – уый хæстæгдæр рæстæгмæ фæндтæ. Ныр та уал хъæуы банхъæлмæ кæсын, республикæ æхца куы райса, уымæ.
