Хъæбатыр æфсæддон Сергей Харченко йæ хæстон фæндæгтæ никуы ферох кæндзæн. Афгынистаны цы 3 азы арвыста, уыцы цаутæ æнустæм ныууагъта адæмæн йæ чингуыты «Трудная
Афганистанмæ Сергей Харченкойы арвыстой 1983-æм азы. Уыцы рæстæгмæ æфсæддон афицерæн уыд майоры ном. Каст фæцис Орджоникидзейы уæлдæр иумæйаг æфсæддон командæгæнæн училищæ æмæ уый фæстæ службæ кодта Прикарпатаг æфсæддон зылды. Афганистаны уыд æхсæн ротæйы командæгæнæг. Нæ сæйраг хæс уыд уыцы бæстæйы цæрджытæн æххуыс кæнын, зæгъы Сергей.
Сергей Харченко, Афганистаны хæсты ветеран: «Патриотон хъомылад уыцы рæстæг тынг бæрзонд æмвæзадыл æвæрд уыдис. Иу суткæмæ се ппæт афицертæ æмæ прапорщиктæ ныффыстой курдиæттæ, цæмæй барвæндонæй Афганистанмæ ацæуой. Æз та уырдæм 4 азы фæстæ бахаудтæн. Не хсæн ротæ фæстæдæр се ппæт дæр Афганистанмæ æрвыст æрцыд».
Сергей Харченко цы ротæйæн команды кодта, уый хъахъхъæдта Афганистаны сæйраг фæндаг термез-Кабулы ту хай – 13 километры. Уыдис ын стыр нысаниуæг.
Сергей Харченко, Афганистаны хæсты ветеран: «Кæй зæгъын æй хъæуы, æнцон цард нын нæ уыд Афганистаны. Фæлæ иу сывæллæтты дзæбæх кæнын бахъуыд, уæдæ-иу зæронд адæммæ дæр фæкастыстæм. Уыдис иу ахæм хабар дæр, æмæ рынчындонмæ искæйы фæласынц, æмæ иу бар радтам фæндагыл ацæуынæн. Афганистан æз хорз æнкъарæнтимæ æрымысын. Мæ бон афтæ зæгъын у, æмæ уыцы цалдæр азы уыдысты мæ царды хуыздæр рæстæг».
Сергей Харченкойы хæст тынг бафхæрдта. Сергейыл схæцыд минæ, æмæ уый тыххæй абоны онг цæстæй нал уыны, Афганистаны фесæфта йæ къах дæр, фæцис бирæ æндæр цæфтæ дæр. Фæлæ уæддæр йæ царды ныфс нæ асаст. Фæстæдæр Сергей Харченко ныффыста дыууæ чиныджы – «Трудная дорога на Кабул» æмæ «Возвращение к жизни». Уым радзырдта, йемæ чи службæ кодта, уыцы афицерты æмæ салдатты тыххæй.
Сергей Харченко, Афганистаны хæсты ветеран: «Советон лæппутæ уым сæхи тынг хъæбатырæй равдыстой. Кæрæдзийæн ныфс уыдыстæм. Иу иннæйы иунæгæй нæ ныууагътаид, цыфæнды зын уавæрты дæр кæрæдзийæн æххуыс кодтам».
Абон Сергей Харченкойæн ис уарзон бинонтæ. Ис ын дыууæ фырты æмæ дыууæйæ дæр ацыдысты сæ фыды фæдыл, сты æфсæддонтæ.
Гугкаты Иринæ
