Хæрзад æмæ пайдайаг хæринаг. Сæкæрнизæй рынчын чи у, уыдонæн Хæххон паддзахадон аграрон университеты биотехнологон факультеты студенттæ æрхъуыды кодтой сæрмагонд
Цæмæй хæринаг æнæниздзинадæн уа пайдайаг, æмæ ма хæрзад дæр, ууыл архайынц хæххон паддзахадон аграрон университеты биологон факультеты студенттæ. Æмæ зæгъын хъæуы, сæ хæс сæххæст кодтой. Диетæмæ гæсгæ рецепттæм бафтыдтой сфæлдыстад дæр. Раздæр уал Уаниты Аленæ йæ продукт схуыдта «Арвæрдын». Сæрмагондæй конд у, сæкæрниз кæмæ ис, уыдонæн. Куы дзы хæрай, уæд туджы сæкæр фæкъаддæр вæййы.
Уаниты Аленæ, Хæххон паддзахадон аграрон университеты биотехнологон факультеты студенткæ: «Ацы продукт скодтам нæ факультеты, нæ ахуыргæнæджы разамындæй. У пайда, нæ хъуыдымæ гæсгæ. Бафтыдтам æм кæсаг, æмæ халсартæ, цæмæй йын рæсугъд хуыз уа, уый тыххæй».
Дулаты Тугъан та йæ рецепты спайда кодта хохаг хъæдурæй, нартхорæй æмæ оливкæтæй. Куыд зæгъы, атæмæй йе рхъуыдыгонд хæринаг хъæздыг у витаминтæй æмæ микроэлементтæй.
Зын хæс уыди Мария Назаровайы раз дæр. Фæндыди йæ сывæллæттæн диетæ æрхъуыды кæнын, цæмæй скъоладзаутæ пайдайаг хæринæгтæ хæрой, уый тыххæй. Уымæ гæсгæ æрхъуыды кодта кæсæгтæй конд котлеттæ.
Ацы банкæмæ та мозикæмæ кæсæгау кæсæн ис. Басаты Оксанæ йæ консервтæй салатæн дæр ахæм ном уый тыххæй радта. Уæвгæ ацы студентты рецепттæн ис наукон бындур, зæгъынц биологон наукæты доктортæ. Царды сæ куы пайда кæной, уæд зæрдæ дарæн ис, адæм æнæниз æмæ пайда хæринаг кæй хæрдзысты, ууыл.
Дзантиаты Ларисæ, биологон наукæты кандидат: «Не студенттæ тынг зæрдиагæй кусынц. Уымæй дарддæр архайынц алыхуызон секциты дæр. Æз мæ студенттæй разы дæн. Дарддæр дæр цæудзысты наукæйы фæндагыл. Æмæ зæрдæ дардзыстæм, стыр æнтыстдзинæдтæ сын кæй бафтдзæн, ууыл».
Нырма бæлвырд бæрæг нæма у, ацы хæринæгтæ дуканиты æмæ студентон хæрæндæтты фæзындзысты, æви нæ, уый. Фæлæ сæ ахуыргæндтæ стыр пайдайыл куы банымайой, уæд ацы цымыдисаг рецептты автортæ, æнæмæнг, сæ зæрдæ дардзысты ног æнтыстдзинæдтыл.
