Йæ сæйраг нысан у педагогтæн æмæ хъомылгæнджытæн баххуыс кæнын
Ахуырадон интенсив «Операция Æнимация»-йы тыххæй цыбыр æмгъуыдмæ бирæтæ базыдтой. Йæ сæйраг нысан у педагогтæн æмæ хъомылгæнджытæн баххуыс кæнын. Уæлдайдæр та, сывæллæтты ирон æвзагыл чи ахуыр кæны, уыдонæн. Проектыл бакуыста Хабæты Альбинæ. Йæ куыст зæрдæйæ уарзы. Уымæн æвдисæн – æрæджы ахуырадон интенсив уæлахиздзау кæй сси Æппæтуæрæсеон фæсивæдон конкурсы. Хъайтмазты Дзерассæ радзурдзæн бæлвырддæр.
Хетæгкаты Къостайы зындгонд æмдзæвгæ мультфильмы хуызы скодтой ахуырадон интенсив «Операци «Æнимаци»-йы æппæтæй æвзонгдæр архайджытæ. Телепроект «Позитивчики»-йы командæ арæхстджынæй цæттæ кæны ТВ-контент. Ныр ахуыр кæны ног хъуыддагыл. Экраныл – æрра фыййау æмæ мигъ, сæ фæстæ та – райгуырæн зæххы хæхты пейзаж. Æмæ, сæйрагдæр та, се ппæтæн зындгонд уацмысы рæнхъытæ ирон æвзагыл.
Ахуырадон интенсив «Операци «Æнимаци» фылдæр арæзт у ныры æмæ фидæны педагогтæн æмæ хъомылгæнджытæн, уæлдайдæр та сывæллæтты ирон æвзагыл чи ахуыр кæны, уыдонæн. Дзгойты Маринæ рæвдауæндоны амоны ирон æвзаг. Куыд зæгъы, афтæмæй йын сабитимæ куысты мультипликаци пайда уыдзæн.
Операци «Æнимаци» у Хабæты Альбинæйы проект. Йæхæдæг цæттæ кæны мультфильмтæ æмæ ууыл ахуыр кæны иннæты дæр. Йæ ахуырадон интенсив сси фæсивæдон хъуыддæгты фæдыл федералон агентады Æппæтуæрæсеон конкурс «Гранты»-йы уæлахиздзау. Хъæппæрис æххæстгонд цæуы нацпроект «Фæсивæд æмæ сывæллæттæ»-м гæсгæ. Фыццаг къæпхæн уыд февралы. Архайджыты ахуыр кодтой алыхуызон техникæтæм гæсгæ кусыныл.
Проекты се ппæт архайджытæ дæр райстой лæвæрттæ æмæ сертификаттæ. Специалисттæ куыд загътой, афтæмæй интенсивы рæстæг цы мультфильмтæ бацæттæ кодтой, уыдон хъуамæ æвдыст цæуой республикæйы ахуыргæнæндæтты.
Проект «Операци «Æнимаци» раргом кодта мультипликацион дæсныйады сусæгдзинæдтæ цæгатирыстойнаг педагогтæн. Райстой ахсджиаг фæлтæрддзинад æмæ базыдтой ирон æвзаг амоныны ног методикæтæ.
