Æвдыст дзы цæуынц зындгонд уырыссаг нывгæнджыты репродукцитæ
Ахуырадон центр «Интеллект»-ы бындурыл сывæллæтты рæвдауæндоны байгом цымыдисаг аивадон галерей. Æвдыст дзы цæуынц зындгонд уырыссаг нывгæнджыты репродукцитæ. «Сывæллæтты рæвдауæндоны нывты галерей» у федералон проект. Æххуыс кæны рæзгæ фæлтæры æнцон æмбарæн æмæ ирхæфсæн хуызы базонгæ кæнын аивады шедевртимæ. Сывæллæттæ нывты репродукцитæм æрмæст кæсгæ нæ кæнынц, фæлæ ма сæхи бафæлварынц экскурситæ амонджыты хуызы дæр. Бæлвырддæр радзурдзæн Хъайтмазты Дзерассæ.
Алы лыстæг хъуыддаг фиппайгæйæ, æцæг экскурситæ амонджыты хуызæн, сывæллæттæ хистæрты абалц кæнынмæ хонынц аивады дунемæ. Нывыл цы уынынц, æрмæст уый тыххæй нæ дзурынц. Архайынц,нывгæнæг цы равдыста, уый истори раргом кæныныл. «Грачи прилетели», «Девочка с персиками», «Утро в сосновом лесу»… Ацы æмæ уырыссаг нывкæнынады æндæр шедевртæ рæзгæ фæлтæрæн ныр хорз зонгæ сты.
Сывæллæтты рæвдауæндоны нывты галерейы ис уырыссаг нывгæнджыты 50 репродукцийы. Алкæцыдæр сæ ам ис, цæмæй сабитæ базонгæ уой аивадон уацмыстимæ, æмæ сæ æмбарыныл сахуыр уой. Ныр ма уал уый къухы æфты хъомылгæнджыты æмæ ныййарджыты æххуысæй.
Цæгат Ирыстон Уæрæсейы сси, проект «Сывæллæтты рæвдауæндоны нывты галерей» æххæстгонд кæм цæуы, ахæм 36-æм регион. Специалисттæ куыд зæгъынц, афтæмæй ацы хъуыды у, æппæт бæстæйы традицитæ æмæ хæзнатæ бахъахъхъæныны фæрæзтæй иу.
Аивадон галерей кæй байгом, уый сывæллæтты рæвдауæндонæн сси æцæг цау. Æмæ хуымæтæджы нæ. Чи зоны, сæрмагондæй ам райгуырдзæн аивадмæ уарзондзинад фидæны номдзыд нывгæнæджы зæрдæйы.
