Архайдтой дзы фидæны педагогтæ дæр – паддзахадон университеты ирон филологийы факультеты æмæ педагогон колледжы студенттæ
Ахуырады кусджыты зонындзинæдтæ фылдæргæнæн институты арæзт æрцыд олимпиадæ ирон æвзаг æмæ литературæйы ахуыргæнджытæн. Архайдтой дзы фидæны педагогтæ дæр – паддзахадон университеты ирон филологийы факультеты æмæ педагогон колледжы студенттæ. Æдæппæтæй 50 адæймаджы. Ахæм олимпиадæ арæзт æрцыд фыццаг хатт, ахуыргæнæджы аз æххæстгæнгæйæ, æмæ йæм æрбахуыдтой не сфæлдыстадон къорды дæр.
Хъайтыхъты Риммæ у 5-æм профессионалон училищæйы ирон æвзаг æмæ литературæйы ахуыргæнæг. Ис æм стыр педагогон фæлтæрддзинад, фæлæ уæддæр æдзухдæр йæхиуыл кусы. Уымæ гæсгæ йын ирон æвзаг æмæ литературæйы ахуыргæнджыты олимпиадæйы архайд ахсджиаг у.
Хъайтыхъты Риммæ – 5-æм профессионалон училищæйы ирон æвзаг æмæ литературæйы ахуыргæнæг: «Стыр арфæ кæнын, ахæм фадат нын кæй ис, æрбацу æмæ байхъус. Кæстæртæ дзы кæй ис, уый мын бынтон æхсызгон у. Æрбацыдсты студенттæ. Уыдон абон цы фехъусой махæй дæр, ахуыргæнджытæй дæр æмæ институты кусджытæй дæр, уый сын бирæ пайда æрхæсдзæн. Уый тынг æхсызгон у».
Ирон æвзаг æмæ литературæйы ахуыргæнджыты олимпиадæ фыццаг хатт арæзт æрцыд. Архайынц дзы фидæны педагогтæ дæр – паддзахадон университеты ирон филологийы факультеты æмæ педагогон колледжы студенттæ. Æдæппæтæй 50 адæймаджы. Ерыс арæзт у 2 хайæ. Фыццаг – тестты хуызы, дыккаг та – сæрмагонд рубрикæ. Уымæ гæсгæ архайджытæ дзуапп лæвæрдтой ахуыргæндты, се *мкусджыты æмæ студентты фæрстытæн. Сæ тематикæ – алывæрсыг. Зæгъæм, 13-æм скъолайы ахуыргæнæг Танделаты Розæйы фарст баст уыд рагон ирон хъæзтытимæ. Архайджытæ ма афæлвæрдтой тыччытæй дæр ахъазын. Цымыдисаг фæрстатæ бацæттæ кодтой студенттæ дæр.
Годызты Аринæ – ЦИПУ-йы ирон филологийы факультеты 4-æм курсы студенткæ: «Мах олимпиадæмæ бацæттæ кодтам тынг цымыдисаг куысты хуыз. Хуыйны кроссенс. Баст у нывтимæ. Раргом кæнын фæхъæуы темæ. Фæцæуы галиуырдыгæй рахизырдæм – сæтæлæг куыд фæцæуы, афтæ. Схонæн æй ис ассоциациты нывтæ».+ «Абоны темæ баст уыд Къостайы «ирон фæндыримæ». Мæнмæ гæсгæ ахуыргæнджытæн тынг цымыдисаг уыд. Уайтагъд дæр æй базыдтой. Сæ зæрдæмæ тынг фæцыд».
Олимпиадæ арæзт æрцыд ахуыргæнæджы аз æххæстгæнгæйæ. Бацæттæ йæ кодта ахуырады кусджыты зонындзинæдтæ фылдæргæнæн институты ирон æвзаг æмæ литературæйы кафедрæ.
Майрæмыхъуаты Фатимæ – Ахуырады кусджыты зонындзинæдтæ фылдæргæнæн институты ирон æвзаг æмæ литературæйы кафедрæйы сæргълæууæг: «Ацы мадзалы фæрцы ма ахуыргæнджытæ иу хатт æркæсдзысты сæхи зонындзинæдтæм. Ахъуыды кæндзысты, цавæрдæр хъуыддæгтæ фаг нæ зонын, зæгъгæ. Чи зоны, чидæр йæхиуыл фылдæр акуса. Чи зоны, чидæр бадис кæна цавæрдæр фарстыл. Ис бирæ цымыдисаг фæрстытæ, программæйы чи нæ ис, ахæмтæ дæр». + «Тынг нæ фæнды, цæмæй ныхкъуырд мачи æрцæуа, макæй батыхсын кæнæм. Ацы мадзал дарддæр дæр куы цæуид, уый нæ фæнды. Мыййаг, исчи куы зæгъа, æвзæр зонындзинæдтæ куы райсон, уæд мыл исчи куы фæхуда, зæгъгæ. Цæмæй уый ма уа, уый нæ тынг фæнды».
Олимпиадæйы хатдзæгтæ сбæрæг уыдзысты цалдæр боны фæстæ. Фылдæр баллтæ кæмæ уа , уыдоны номхыгъд равæрдзысты ахуырады кусджыты зонындзинæдтæ фылдæргæнæн институты сайты.
