Ард бахордтой мемориалон комплекс «Барбашовы фæз»-ы
Ахуырады центр «Диалог»-ы 39 ахуырдзауы баххæст кодтой республикæйы кадетты рæнхъытæ. Ард бахордтой мемориалон комплекс «Барбашовы фæз»-ы. Райстой сæ фыццаг пъагæттæ дæр. Ног кадеттæ ахуыр кæнынц Уæрæсейы гвардийы фыццаг къласы Цæгат Ирыстоны. Хæссы, куыд скъола йæхæдæг дæр, афтæ Уæрæсейы хъæбатыр Тыбылты Мараты ном. Кадджын мадзал бабæрæг кодтой Дзæуджыхъæуы 46-æм æмæ Дæллаг Санибайы скъолаты Тыбылты Мараты ном цы кълæстæ хæссынц, уыдоны ахуырдзаутæ. Архайдтой ма дзы республикæйы разамынды, Уæрæсейы гвардийы минæвæрттæ, Хъæбатыры хиуæттæ. Раарфæ кодтой кадеттæн. Дарддæр мадзал ахæццæ скъолайы бæстыхайы. Уым ахуырдзаутæ равдыстой музыкалон номыртæ патриотон темæмæ гæсгæ. Зæлыдысты зарджытæ, æмдзæвгæтæ, уыдис ма флешмоб æмæ кинонывы равдыст. Центр «Диалог»-ы Слестгæнæн комитеты кадетон кълæстæ фыццаг аз нæ архайынц. Ахуыр дзы кæнынц 10-æм æмæ 11-æм кълæсты хуыздæр ахуырдзаутæ. Ныр та ма семæ сты Уæрæсейы гвардийы 7-æмкъласон-кадеттæ дæр.
