12 азы размæ 20-æм сентябры Гæналдоны комы цы зæй рацыд уый стыр зиан æрхаста канд комы цæрджытæн нæ, фæлæ æнæхъæн Уæрæсейæн дæр.
Хæмыцаты Эльбрус Санибайы æрцард 30 азы размæ, ам балхæдта æнусон хæдзар, балхæдта фос æмæ сси фермер. Фæлæ 12 азы размæ æрдзон фыдбылыз куы æрцыд, уæд йæ хæдзарад доны бын фæцис æмæ Эльбрус ногæй горæты æрцыд. Фæстæмæ раздæхыны фæнд æм уыд, фæлæ йæ ныфс нæ хаста. Абон зæгъæн ис æмæ комы цард нывыл кæны. Зæй цы бынаты æрцыд, уый йæ хуыз аивта. Ахуыргæндтæ сæ цæст дарынц Хъола йæхи куыд дары уымæ. Сæ нысан у ног фыдбылыз ма руадзын.
Хæмыцаты Эльбрус, Санибайы цæрæг: «Цъити куы рацыд, уæд иуæн дæр йæ зæрдæ нал ради. Иууылдæр цæуынмæ хъавыдысты. Мæн иу афарстой, ды цæудзынæ, зæгъгæ æмæ загътон æз ам баззайдзынæн. Æмæ уæд ничиуал ацыдис. Фæлæ мæнæ кæсут бирæ адæм хæдзæрдтæ аразынц. Дачæтæ кæй хонынц, ахæмтæ. Фос дзы чи дары ахмæтæ дæр дзы и сиу 8 хæдзары. Цард уæддæр дарддæр цæуы».