Цæгат Ирыстоны цъититимæ баст процесстæм сæ цæст дарынц геофизикон институты æмæ гидрометео центры специалисттæ
Æрдзон фыдбылызы цаутæ, абон дæр, адæмы зæрдæты сты чи нæ байгас, ахæм хъæдгомы хуызæн. Фæлæ рæстæг йæ кæнон кæны, æмæ абон Хъæрмæдоны комы цард дарддæр цæуы. 21 иу азы рзмæ ихзæй кæм рацыд, уым ныртæккæ æрдз снывæзта йæхи æрдзон нывтæ. Фæлæ ахуыргæндты æргом раздæрау здæхт у Хъолайы цъитимæ. Бирæ азты ахуыргæндтæ архайынц фыдбылызы аххосæгтæ базонын. Специалисттæ иу хъуыдымæ нæма рцыдысты. Сæ иртæстыты хатдзæгтæ хицæн кæнынц. Ныртæккæ ахсджиаг у, цъитимæ бæстон цæстдарын. Темæ дарддæр ахæццæ кæндзæн Тъехты Элинæ.
Сыгъдæг уæлдæф. Хуры тынтæ тавынц сау, айнæгджын къæдзæхтæ. Æмæ уыцы нывмæ кæсгæйæ адæймагмæ афтæ фæкæсы, цыма æгомыг хæхты ныцы бахъыгдардзæн, уыйау. Фæлæ 2002-æм азы Хъæрмæдоны цы æвирхъау цау æрцыд, уый дзурæг у ууыл, æмæ зианхæссæг цаутæ æрбацæуынц, адæймаг сæм æнхъæлмæ дæр куы нæ фæкæсы, уæд. Ахуыргæндтæ ныр дæр иу хатдзæг не скодтой, егъау æрдзон фыдбылыз цæмæн æрцыд, уымæн.
Хъолайы цъити цæстыфæныкъуылдмæ ахаста 120 адæймаджы цардæй фылдæр. Йæ аххосаг цы у, уый ныр дæр ничи зоны. Фæлæ æппæтæй парахатдæр хъуыды у, ома, дам, цъити йæхæдæг расайдта уыцы знаггад.
Ахуыргæндтæ куыд зæгъынц, афтæмæй уыцы рæстæг Хъолайы цъити критикон массæ нæма сæмбырд кодта. Бирæтæ знаггад бæттынц гидравликон цæфимæ, кæнæ та газы динамикон гуыппимæ.
Уыцы хъуыддаджы тыххæй рагагъоммæ базонæн уыдис æви нæ, уыцы фарстæн дзуапп раттын зын у. Бæрæг у æрмæстдæр иу – фидæны ахæм цаутæ хъуамæ мауал бауадзæм æрцæуын. Цъитимæ ныр дæр ахуыргæндтæ сæ цæст дарынц. Фæлæ куыд зæгъынц, афтæмæ цы мониторингтæ кæнынц, уыдон фаг не сты. Хъæуы сгæрстытæм бæлвырддæр æркæсын.
Цæгат Ирыстоны цъититимæ баст процесстæм сæ цæст дарынц геофизикон институты æмæ гидрометео центры специалисттæ. Цæстдарды системæ хъæуы сифтонг кæнын уæлæмхасæн кусæнгæрзтæй. Фæлæ уыцы хъуыддагæн нырма фæрæзтæ нæй – зæгъынц ахуыргæндтæ. Зæрдæ дарынц, Хъолайы цъитийæн цы аххосаг уыд, уый кæй базондзысты, ууыл.
