Архайдтой дзы нæ республикæйы рæвдауæндæтты хъомылгæнджытæ ирон æвзагæй
Ахуыргæнджыты зонындзинæдты фылдæргæнæн институты арæзт æрцыд брейн-ринг. Архайдтой дзы нæ республикæйы рæвдауæндæтты хъомылгæнджытæ ирон æвзагæй. Æдæппæтæй 21 адæймаджы. Уыдонæй арæзт æрцыд 3 къорды: «Арвæрдын», «Æнгуз» æмæ «Цыкуратæ». Хъомылгæнджытæ сæ зонындзинæдтæ æвдыстой ирон æвзаг ахуыр кæныны методикæйæ æмæ бæстæзонынадæй. Архайдтой сфæлдыстадон конкурсты. Дзуæппытæ лæвæрдтой кæрæдзийы фæрстытæн. Сæ дæсныйад сын иртæстой жюрийы уæнгтæ. Йæ сæрдар уыди институты проректор Фардзинты Мæдинæ. Арф зонындзинæдтæ сæ равзæрст дæсныйады, æнæкæрон уарзондзинад мадæлон æвзаг æмæ райгуырæн зæххмæ – хорз цæттæдзинад равдыстой хъомылгæнджытæ. Командæтæй арæхстджындæр разынд «Арвæрдын». Уый бацахста фыццаг бынат. «Цыкуратæ» систы дыккæгтæ. Æртыккаг бынат жюрийы уæнгтæ саккаг кодтой «Æнгуз»-æн. Брейн-ринджы архайджытæн лæвæрд æрцыдысты кады гæххæттытæ.
