Фæндæгтыл æдасæй цæуыны паддзахадон автоинспекцийы кусджытæ бæрæг кæнынц, скъолаты раз цы фæндæгтæ ис, уыдон куыд ифтонг сты сæрмагонд нысантæй. Уыцы хъуыддаг
Коминтерны уынджы скъолайы цур цы фæндаг ис, уымæ паддзахадон автоинспекцийы кусджытæ ссардтой фаутæ. Фистæгæй цæуджытæн фæндаджы сæрты ахизыны бар ис, ис дзы фæндаггон нысантæ дæр, фæлæ дзы цы къахвæндаг ис, уый, кæронмæ конд не `рцыд. Беслæны администрацимæ `рвыст æрцыд фыстæг, цæмæй хъæндзинад аиуварс кæной, уый тыххæй.
Кокайты Ирбег, фæндæгтыл æдасæй цæуыны паддзахадон инспекцийы хайады хицауы хæдивæ г: «Кæсæм фæндаджы нысантæм, ома знактæм, светофортæм, разметкæмæ. Паддзахадон автоинспекции кусджытæ, мæнæ районтæм цæуæм. Уавæр хорз нæу, фæлæ йæ бынтон æвзæр дæр схонæн нæй. Куыстытæ ма дзы ис. Скъолаты цур кæнæм фæндаггон къуыбыртæ, къавæндæгты размæ, цæмæй сывæллæттæн дæр æнцондæр уа ахизæн фæндаджы сæрты».
Фæндæгтыл æдасæй цæуыны паддзахадон автоинспекцийы кусджытæ куыд зæгъынц, афтæмæй ахуырадон уагдæтты, стæй бирæ адæм кæм вæййы, уыцы бынæтты цур фæндæгтæм хъуамæ уа уæлдай цæстдард. Хъуамæ дзуапп дæттой æдасдзинады æппæт домæнтæн дæр.
Фæндæгтыл конд къуыбыртæ, фæндаггон нысантæ, къахвæндаг æмæ цырæгътæ. Ахæм карз домæнтæн хъуамæ дзуапп дæттой, скъолаты цур цы фæндæгтæ ис, уыдон се `ппæт дæр.
Автоинспекцийы кусджытæ бæрæг кодтой Джыбылаты Зауры номыл уынджы цы объекттæ ис – профессиналон училищæ æмæ музыкалон скъола, уыдоны цæттæдзинад дæр. Фыццаджыдæр, сæ цуры фæндагыл конд æрцыд къуыбыртæ. Автоинспекцийы кусджытæ, куыд зæгъынц, афтæмæй уыдоны руаджы шофыртæ сæ цыд зынгæ фæкъаддæр кæнынц. Тынг хъæугæ та ам уымæн сты, æмæ дзы нæй къахвæндаг.
Кокайты Ирбег, фæндæгтыл æдасæй цæуынын паддзахадон инспекцийы хайады хицауы хæдивæ г: «Ам цалдæр азы размæ фæндаг цалцæг кодтой, бордюртæ баивтой, ног асфальт сæвæрдтой, æмæ куыстытæ куыд кодтой, уæд дзы уыдис къахфæндаг. Æмæ уыцы куыстытæ куы кодтой, уæд къахфæндаг зæххы бын фæцис, æмæ йæ администрации дæр нал скодта. Цалдæр азы нæхæдæг дæр фыссæм, Беслæны администрацимæ, уымæн æмæ ам сывæллæттæ музыкалон скхоламæ цæуынц, стæй дзы чи цæры, уыцы адæм дæр, цæмæй дзы къахфæндаг скæной».
Беслæны администрацийы куыд зæгъынц, афтæмæй æппæт хъæндзинæдтæ дæр ахуыры азы райдайæнмæ аиуварс кæндзысты. Ацы куысты къуылымпыдзинæдтæ уымæн фæзынд, æмæ бюджеты фæрæзтæ фаг не сты, æмбарын кæнынц Беслæны мэрийы специалисттæ.
Хæуытаты Герман, Беслæны администрацийы сæргълæууæг: «Уыдис нæм фæндæгтыл æдасæй цæуыны къамисы æмбырд. Уым дæр ацы фарстайыл æрдзырдтам. Не скъолаты цур цы фæндæгтæ ис, уыдонæн сæрмагонд нысантæй æххæст сты сæ нæуæдз проценты. Ис ма дзы хъæндзинæдтæ, ис нæм паддзахадон автоинспекцийæ фыстæджытæ дæр. Æмæ сæ ауварс кæныныл бакусдзыстæм».
Æппæт фæндаггон нысантæ дæр хъуамæ æвæрд æрцæуой бынæттон администрацийы хъæппæрисæй. Кæм æмæ цавæр фæткмæ гæсгæ, уый та бæрæг кæнынц паддзахадон автоинспекцийы специалисттæ. Ацы хъуыддаг хъуамæ æххæстгонд æрцæуа 1-æм сентябрмæ.
Гугкаты Иринæ
