Бацæттæ сæ кодтой ахуырадон центр «Вершина»-йы педагогтæ æмæ психологтæ
Ахуыры рæстæг историйæ хорз зонындзинæдтæ чи равдисы, уыцы ахуырдзаутæ архайдтой скъоладзауты æппæтуæрæсеон олимпиадæйы. Бацæттæ сæ кодтой ахуырадон центр «Вершина»-йы педагогтæ æмæ психологтæ. Уæлахиздзаутæ архайдзысты æппæтуæрæсеон олимпиадæйы фæстаг къæпхæны. Уый Цæгат Ирыстоны историйы фыццаг хатт ацæудзæн нæ республикæйы. Чехойты Фатимæ радзурдзæн бæстондæр.
120 скъоладзауæй фылдæр архайдтой олимпиадæйы историйæ. Дыууæ боны дæргъы ахуырдзаутæ фæлвæрттой сæ зонындзинæдтæ рагзамантæй 20-æм æнусы онг.
Ахуырадон центр «Вершина» байгом, национ проект «Ахуырад» æххæст кæнгæйæ. Уый хорз фадат дæтты Цæгат Ирыстоны скъоладзаутæн бындуронæй æппæтуæрæсеон олимпиадæтæм цæттæ кæнынæн æмæ дзы уæлахиздзаутæ суæвынæн.
Æппæтуæрæсеон скъоладзауты олимпиадæ алы аз арæзт фæцæуы 24 предметæй. Йæ архайджытæ свæййынц 6 милуан сывæллонæй фылдæр. 7-æй – 11-æм къласонтæн арæзт æрцæуы муниципалон къæпхæн. Регионалоны та фæархайынц ахуырдзаутæ – 9-æмтæй 11-æм кълæсты онг.
Скъоладзауты æппæтуæрæсеон олимпиадæмæ ахуыргæнджыты *мрæнхъ фæцæттæ кæнынц психологтæ дæр, цæмæй ахуырдзаутæ ма тыхсой, сæ куыстытæн сын бынтон бæрзонд хатдзæгтæ куы нæ скæной, уæддæр.
Ацы аз апрелы Цæгат Ирыстоны историйы фыццаг хатт республикæ суыдзæн, историйæ скъоладзауты æппæтуæрæсеон олимпиадæйы фæстаг къæпхæн кæм ацæудзæн, ахæм фæз.
Скъоладзаутæ æппæтуæрæсеон олимпиадæйы фæстаг къæпхæны хорз бæрæггæнæнтæ куы райсой, уæд сын Иумæйаг паддзахадон фæлварæнмæ æфтыд æрцæудзысты уæлæмхасæн баллтæ, уый нæ, фæлæ ма профилон уæлдæр ахуыргæнæндæттæм сæ бон бацæуæн уыдзæн æнæ фæлварæнтæй. Стæй ма сын бар уыдзæн фæрæзты уæлæмхасæн программæты архайынæн дæр.
