Проект баст у саскты уникалон хуызтæ бахъахъхъæнынимæ
Дзæуджыхъæуы Дзанайты Азанбеджы номыл аивадон училищæйы студенттæ бацæттæ кодтой цæугæ равдыст «Цæгат Ирыстоны стæм гæлæбутæ». Проект баст у саскты уникалон хуызтæ бахъахъхъæнынимæ. Уазджытæн бацæттæ кодтой информацион стендтæ æмæ сарæзтой дæсныйадæвдисæг ахуыртæ штампы мыхуырæй. Равдысты фыццаг фæз сси Тауаситы Сослæнбеджы номыл нывкæнынады скъола. Дарддæр экспозици абалц кæндзæн республикæйы æндæр ахуыргæнæндæттæм. Бæлвырддæр радзурдзæн Хъайтмазты Дзерассæ.
Æрдзы хъæздыг хæзнатæ ирд стендтыл. «Цæгат Ирыстоны стæм гæлæбутæ»». Афтæ хуыйны Дзанайты Азанбеджы номыл аивадон училищæйы хистæркурсонты къухтæй фыст куыстыты равдыст. Экспозици зонгæ кæны республикæйы цымыдисагдæр саскты хуызтимæ. Студенттæ сæ сфæлдыстой алчидæр йæхи техникæйы æмæ ныффыстой цымыдисаг хабæрттæ сæ царды уагы, хи дарыны хицæндзинæдты æмæ хуызтæ бахъахъхъæныны мадзæлтты тыххæй. Зæгъæм, Ангелина Мкртычан равдысты уазджыты базонгæ кодта гæлæбу «Бражник Глазчатый»-имæ.
Дизайны хайады мастертæ проектыл куыстой 6 мæйы. Уый у сæ курсон куыст. Рахастой йæ Тауаситы Сослæнбеджы номыл нывкæнынады скъолайы ахуырдзауты æмæ фидæны нывгæнджыты размæ республикæйы алы районтæй. Ангелина Мкртычан куыд зæгъы, афтæмæй куы базыдта, йæ уацмыс сывæллæттæ кæй фендзысты, уый, уæд ацы хъуыддагмæ сæрмагонд зæрдæйы ахастимæ бавнæлдта.
Стæм гæлæбутæ студентты сразæнгард кодтой сфæлдыстадмæ. Экспозицийы ма ис сувенирон продукци равдысты символикæимæ. Футболкæтæ, банданæтæ, лæваргæнæн пакеттæ, тæбæгътæ…Нырма уал сæ ис æрмæст фенæн, фæлæ гæнæн ис, æмæ сæ тагъд балхæнын дæр уыдзæн. Мадзал у рухстауæн. Скъоладзаутæн сарæзтой дæсныйадæвдисæг ахуыр штампы мыхуырæй. Студентты æмæ ахуыргæнджыты нысан уыд, æрмæст архайджыты сфæлдыстадон хъомыс раргом кæнын нæ, фæлæ ма райгуырæн зæххы æрдз хъахъхъæныныл ахуыр кæнын.
Экспозици лæвæрд æрцыд национ музейæн. Ныр балц кæндзæн республикæйы алы скъолатæм æмæ алы сывæллоны дæр зонгæ кæндзæн æрдзы алæмæты дунеимæ. Тауаситы Сослæнбеджы номыл нывкæнынады скъола номхыгъды сси фыццаг. Училищæйы бирæ студенттæн се сфæлдыстадон фæндаг райдыдта ам, уымæ гæсгæ ацы фембæлдæн ис сæрмагонд нысаниуæг.
Гæлæбутæ цæрынц æрмæст цалдæр боны, фæлæ уыцы цыбыр рæстæгмæ дæр дунейæн балæвар кæнынц диссаджы рæсугъддзинад. Гæнæн ис, æмæ ацы равдыст рæзгæ фæлтæры сразæнгард кæндзæн сфæлдыстадæй архайынмæ.
