Специалисттæ зæгъынц, сывæллоны алывæрсыг рæзтæн ахсджиаг у эстетикон хъомыладыл кусын
Скрипкæ, кафт, сценикон дæсныйад. Аивады сусæгдзинæдтимæ хуыздæр у сабибонтæй фæстæмæ зонгæ кæнын. Специалисттæ зæгъынц, сывæллоны алывæрсыг рæзтæн ахсджиаг у эстетикон хъомыладыл кусын. Æмæ кæд сывæллон фидæны техникон дæсныйад равзара, уæддæр æй алывæрсыг рæзт нæ бахъыгдардзæн. Æвзонг курдиæтты тыххæй радзурдзæн Фидараты Маринæ.
Цалынмæ æвзонг Евæ скрпикæйыл цæгъдыны сусæгдзинæдтимæ зонгæ кæны, уæдмæ фæлтæрдджындæр Мишель æвдисы йæ арæхстдзинад. Ацы чызджытæ базонгæ сты рæвдауæндоны, æмæ уæдæй фæстæмæ иумæ исынц эстетикон хъомылад дæр. Нотæты дунеимæ зонгæ кæнгæйæ, уыцы-иу рæстæг фæархайынц алыхуызон музыкалон конкурсты.
Мугниева у сывæллæтты рæвдауæндоны сæргълæууæг. Цы скрипкæйыл цæгъды, ууыл цæуы 300 азæй фылдæр. Гергиты Ларисæйы хъомылгæнинаг æмæ музыкалон скъолайы скрпикæйыл цæгъдыны педагог куыд дзуры, афтæмæй скъолайы агъоммæйы кар у æппæтæй хуыздæр, сывæллоны курдиат раргом кæнынæн. Музыкæ хорызрдæм ахады интуицийыл æмæ зондахастыл. Скрипкæйыл цæгъдгæйæ, активонæй кусынц æнгуылдзтæ дæр æмæ сæры магъз дæр.
Классикон музыкæйы фидæны стъалы Хъуылаты Евæ тынг зæрдиагæй архайы скрпикæйыл хорз цæгъдыныл.
Зæрдæргъæвдæй архайынц ацы æвзонг фæсивæд дæр. Болæтаты Катеринæ ныр 10 азы дæргъы кусы кæстæртимæ. Йæхæдæг дæр сабибонтæй фæстæмæ цыди кафджытæм æмæ ма архайдта цирчы аивады. Хореографийы мастер ныр та ахуыр кæны аивæдты лицейы хъомылгæнинæгты.
Кæстæрты зæрдæмæ фæндаг ссарын æнцон хъуыддаг у, – зæгъы Катеринæ. Уæлдайддæр та аивады. Зæгъæм, кафты фæрцы ис де нкъарæнтæ æмæ хъуыдытæ раргом кæнын. Ахсджиаг ма у уый дæр, æмæ сывæллæттæ тынг лæмбынæг кæсынц се нæниздзинадмæ. Тырнынц классикон кафæджы кадджын ном райсынмæ. Зонгæ кæнынц æмæ царды пайда кæнынц этикæйы бындуртимæ.
Психологтæ зæгъынц, сывæллоны алывæрсыг хъомылады уæлдай ахадындзинад ис эстетикон ахуырадæн. Аивад куыд бæлвырд наукæтæ, афтæ æххуыс кæны сæ цард хъæздыг кæнынæн. Уымæ гæсгæ ахсджиаг у, скъолайы программæйæ дарддæр музыкæ æмæ кафты сусæгдзинæдтимæ зонгæ кæнын дæр.
