Уый у мысинæгты, фынты æмæ æнкъарддзинады дунейыл афæлгæст
Культурон хъæппæристы президентон фонды проект «Вертинский æмæ Æвзист æнус» æххæстгæнгæйæ Академион уырыссаг театры ацыд музыкалон спектакль «Черный Пьеро»-йы премьерæ. Уый у мысинæгты, фынты æмæ æнкъарддзинады дунейыл афæлгæст. Спектаклыл бакуыста Дагестаны аивæдты сгуыхт архайæг, режиссер Дмитрий Павлов. Проекты разамонæг та у Эмилия Шихрагимова. Постановкæйы архайынц актертæ Санкт-Петербургæй, Дагестанæй, Мæскуыйæ æмæ Саратовæй. Премьерæйы уыд не сфæлдыстадон къорд дæр. Бæстондæр радзурдзæн Чехойты Фатимæ.
Йæ фыццаг уысмæй дæр театралон архайд зæрдæйы агайы. Музыкæ хъыгдаргæ нæ кæны, æххуыс у мидис *мбарынæн. Сценæйы Черный Пьеро хъуыдытæ кæны цардыл. Йæ миддуне раргом кодта, театрдзаутæ та хъусынц, сæйраг хъайтары алы ныхас дæр сæ зæрдæмæ арф айсгæйæ.
Йæ зарджытæ, йе *мдзæвгæтæ, йæ мысинæгтæ театрдзауты ахæссынц, Вертинскийы актерон æмæ поэтикон курдиат куы раргом, уыцы рæстæгмæ. Уырыссаг Пьеройы хъуыдытæ театралон сценæйы – æнкъарæнты æмбырдгонд: æхсызгондзинад æмæ рис, иунæджы цард райгуырæн зæххæй дард. Рухс, музыкæ æмæ актерты хъазт – сценæйы уæлдай ницы ис. Иу нывгæнæджы цæстæнгас – иннæйы цард æмæ сфæлдыстадмæ. Афтæ режиссер Дмитрий Павлов дзуры Александр Вертинскийы тыххæй.
Æрыгон Пьеро – эмиграцийы, урссæр артист – фыдыбæстæмæ сыздæхгæйæ. Вертинскийы сурæт автор сарæзта æнахуыр хуызы. Архайд цæуы, хоры зардмæ хъусгæйæ – театралон постановкæты дзы стæм хатт кæмæй спайда кæнынц.
Спектакль «Черный Пьеро» баиу кодта артистты Уæрæсейы алы регионтæй. Архайдтой дзы актертæ Мæскуйæ æмæ Санкт-Петербургæй, Саратовæй æмæ Дагестанæй. Репетициты рæстæг бацахста мæй æмæ *рдæг. Проекты автортæн Академион уырыссаг театры сценæ æнæзонгæ нæу. Апрелы дзы равдыстой постановкæ Æвзист æнусы поэзийы тыххæй «Я вернулся в мой город».
Вертинскийы «Уырыссаг Пьеро»- йы сценикон сурæтæн йæ рæстæджы аккаг аргъ скодтой дунейы театрдзаутæ. Æнкъард клоун, сыгъдæг зæрдæйы хицау, сау дарæсы, куы тызмæг, куы æлхынцъ ныхасгæнæг, йæ курдиатæй фæндаг ссардта бирæты зæрдæтæм. Дзæуджыхъæуккаг театрдзаутæ дæр æм æвæлмасæй нæ баззадысты. Дыууæ сахаты æрхæндæг хъуыдытæ, музыкалон композицитæ æмæ актерты ирд хъазт – адæм æнæулæфгæйæ хъуыстой сæйраг хъайтары мысинæгтæм. Дзæуджыхъæуы фæстæ спектакль «Черный Пьеро» æвдыст цæудзæн Элистайы, Черкесскы æмæ Дербенты.
