Ирыстойнаг аивадуарзджытæн равдыстой спектакль “Отражения, или Истинное”
Евгений Вахтанговы номыл Академион Уырыссаг театры уыд радон премьерæ. Ирыстойнаг аивадуарзджытæн равдыстой спектакль “Отражения, или Истинное”. Постановкæ бацæттæ кодта Новосибирскæй режиссер Алексей Крикливый. Сюжет дзурæг у 80-йæм азты цаутыл. Премьерæйы тыххæй бæстондæр радзурдзæн Чехойты Фатимæ.
Сюжет арæзт у уарзæтты цыппаркъуымоны алыварс. Рог æмæ лæгъз ныхас *мбæхсы арф ныхмæллæуддзинад, стæй хъайтарты хъысмæт чи аивдзæн, уыцы хатдзæгтæ. Режиссеры цæстæнгас театрдзауты аздæхта 80-йæм азтæм – пьесæ «Отражения, или Истинное» уыцы рæстæг фыст уыд. Премерьæ ацыд Уырыссаг театры сценæйы. Сæйраг хъайтартæй иу у Анни. Йæ фæлгонц ын йæхиуыл чи абарста, уыцы актрисæ – Бестауты Зойæйы ныхæстæм гæсгæ, ролыл бакусынæн бахъуыд цалдæр мæйы. Анни æвдисы адæймаджы мидхъуырдухæн. Уарзондзинад, бæрнондзинад æмæ рæстдзинад ын æнцой нæ дæттынц, æмæ йæ уый кæны хæстæгдæр спектакльмæ кæсынмæ чи *рбацыд, уыцы адæмимæ.
«Отражение, или Истинное» у интеллектуалон хынцинаг царды, уарзондзинады æмæ политикæйы тыххæй. Уацмысы автор у драматург Том Стоппард. Йе сфæлдыстад рагæй зындгонд у театруардзаутæн. Йæ пьесæтæ æнтыстджынæй æвæрд цыдысты бæстæйы хуыздæр театралон сценæтыл. Режиссер Алексей Крикливый Цæгат Ирыстонмæ ссыд Новосибирскæй. Йæ ныхæстæм гæсгæ, йæ зæрдæмæ фæцыд Уырыссаг театры труппæимæ кусын – æхсызгон ын уыд, актертæ премьерæмæ сæхи тынг лæмбынæг кæй цæттæ кодтой, уымæ кæсын.
Премьерæйы равдыст рауад æнтыстджын – театры чысыл сценæйы уыд аншлаг. Академион Уырыссаг театры аивадон разамонæг Владимир Уваровы ныхæстæм гæсгæ, режиссер Алексей Крикливыимæ æмгуыст кæнын нысан кæнынц фидæны дæр.
Спектаклы радон равдыст ма ацæудзæн 20 майы. Постановкæ хаст æрцæудзæн театры репертуармæ, уымæ гæсгæ йæ аивадуарзджытæн фадат уыдзæн иннæ сезонты фенынæн дæр.
