Цæголты Георгийы номарæн музей-хæдзары байгом 2 нывгæнæджы – Сæбанты Хаджумары æмæ Къорнаты Владимиры куыстыты равдыст. Бæрæгбонмæ ма бацæттæ кодтой концертон программæ дæр.
Республикæйы адæмон нывгæнæг Сæбанты Хаджумар канд ныв нæ, фæлæ ма заргæ дæр хорз кæй кæны, уый се ппæтæн дæр зындгонд. Цæголты Георгийы номарæн музейы Дыгуры районы культурæйы хæдзары зарæггæнджыты къордимæ акодта цалдæр хъæбатырты зарæджы. Ам байгом нывгæнæджы куыстыты равдыст. Адæмы размæ рахаста 20 куысты. Сты алы азты конд. Алкæцыйæн дæр сæ ис йæхи истори. Хаджумар куыд зæгъы, уымæ гæсгæ йæ нывты цы фæлгонцтæ ис, уыдонæн сæ фылдæр йæхи цардæй ист сты.
Сæбанты Хаджумар, РЦИ-Аланийы адæмон нывгæнæг: «Хæхбæсты цæрын, æмæ йæ бирæ уарзын. Уæлæ 3 чызджы кæм рацыд, афтæ дæр куыстон. Хуым карстам мæ мадимæ къухæй. 3 чызджы рацыдысты, иу сæ раздæр рацыд, æмæ сæм хъæр кæны: «Цы афон рацыдыстут, цавæр кусджытæ стут», зæгъгæ».
Музейы ма байгом ноджыдæр иу нывгæнæджы куыстыты равдыст. Къорнаты Владимир ацы аивадмæ йе ргом кæд нырма 2 азы размæ йеддæмæ нæ раздæхта, уæддæр ын ныридæгæн чысыл нæ бантыст. Равæрдта 24 куысты алы жанрты конд.
Къорнаты Владимир, нывгæнæг: «2011-æм азы райдыдтон ныв кæнын. Рауадис. Фыццаг зымæг бирæ скодтон, ацы зымæг уый бæрц нал. Æрдзы хъæбысы бирæ нæ вæййын. Мæхи сæрæй сæ райсын. Ахæм куыстытæ никуы ис. Мæхæдæг сæ æрхъуыды кодтон».
Акци «Музейты æхсæв» Дигорайы ныр цалдæр азы арæзт цæуы. Фæлæ йын ахæм хъæздыг программæ фыццаг хатт бацæттæ кодтой. Культурæйы къабазы кусджыты ныхæстæм гæсгæ, уый хуымæтæджы нæу. Музей районы цæрджыты царды ахсджиаг бынат ахсы.
Багомедты Наталья, Дыгуры районы администрацийы культурæйы управленийы хицау: «Æнæ музейæ махæн нæ Дигора фидаугæ дæр нæ кæндзæн. Чи дзы кусы, уыдон архайынц, цæмæй райсомы фæлтæртæн исты хорздзинад баззайа, ууый».
Бæрæгбоны кæронбæттæны арæзт æрцыд концерт. Се сфæлдыстадон арæхстдзинад æвдыстой районы культурæйы хæдзары хъомылгæнинæгтæ. Культурæйы управленийы зæрдæ бавæрдтой, иннæ азмæ ма ноджы цымыдисагдæр программæ кæй бацæттæ кæндзысты, уымæй.
Хъайтмазты Дзерассæ
