26 апреля 2018, 12:30
Акционерон æхсæнад «Росгеологи»-йы специалисттæ Мидæгрæбыны комы агурынц сызгъæрин
Куыстытæ æххæстгонд цæуынц, холдинг Цæгат Кавказы федералон зылды æрдзон æвæрæнтæй пайда кæныны департаментимæ цы паддзахадон контракт бафыста, уымæ гæсгæ.
Акционерон æхсæнад «Росгеологи»-йы специалисттæ Мидæгрæбыны комы агурынц сызгъæрин. Куыстытæ æххæстгонд цæуынц, холдинг Цæгат Кавказы федералон зылды æрдзон æвæрæнтæй пайда кæныны департаментимæ цы паддзахадон контракт бафыста, уымæ гæсгæ. Иртасæн мадзæлттæн радих кодтой 2 хайы Ламардоны æмæ Хохы Хъахъхъæдуры. Бæлвырддæр хабæрттæ радзурдзæн Хъайтмазты Дзерассæ.
Фарон октябрæй фæстæмæ Мидæгрæбыны комы акционерон æхсæнад «Росгеологи»-йы специалисттæ ахадгæ куыст кæнынц. Ам агурынц сыгъзæрин. Ламардоны хайы сæрмагонд техникæйы фæрцы зæххы бынмæ къахынц, æмæ исынц æрзæтты хуызæгтæ.
Куыстытæ сæ тæмæны сты Хохы Хъахъхъæдуры дæр. Ацы хайы æрзæттæм ныхæццæ уæвыны тыххæй хъæуы сæрмагонд къанаутæ скъахын. Иртæстытæ æххæстгонд цæуынц «Росгеологи» Цæгат Кавказы федералон зылды æрдзон æвæрæнтæй пайда кæныны департаментимæ цы паддзахадон контракт бафыста, уымæ гæсгæ. Геологтæ иртæстытæн сбæрæг кодтой 34 квадратон километры бæрц фæзуат.
Ацы куыстытæ æххæстгонд цæудзысты 2019-æм азмæ. Ныридæгæн ис фыццаг бæрæггæнæнтæ.
Уæвгæ, уый фаг нæу, сыгъзæрин промышленнон нысантæн исынæн. Ацы хъуыддагæн хъуамæ æххæстгонд æрцæуой 6 бæрæггæнæны.
Геологтæ фидарæй зæгъынц, æппæт куыстытæ æххæстгонд цæуынц, æрдзхъахъхъæнæн мадзæлттæ хынцгæйæ.
темæмæ гæсгæ
