Муниципалитетты курдиатты фарс рахæцыдысты къамисы æмбырды
Алагиры æмæ Æрæфы районтæ уыдзысты экономикон райрæзты фæзуаттæ. Муниципалитетты курдиатты фарс рахæцыдысты къамисы æмбырды. Амыдта йæ республикæйы хицауады сæрдар Сæбæтхъуаты Æхсарбег. Куыд загъта, афтæмæй ныронг фæлварæн проектты архайдтой Алагиры æмæ Æрæфы районтæ. Уыдон бацæттæ кодтой хъæугæ документтæ, ис ног кусæнуæттæ дзы чи байгом кæндзæн, ахæм амалхъом адæм. Ахæм экономикон фæзуаттæ арæзт цæуынц иу нысанимæ, цæмæй нæ республикæйы райрæзт рæвдздæр цæуа. Алагиры районы нысанты тыххæй бæлвырддæр радзырдта йæ сæргълæууæг Бутаты Арсен. Хъуамæ дзы саразой райрæзты 3 фæзуаты – хъæууон хæдзарады, промышленносты æмæ туризмы къабæзты. Афтæ Дæллаг Уыналы скусдзæн æхсырыкуыстгæнæн цех, Мызуры хуыйæн фабрик, Уæллаг Зджыды та сараздзысты туристон хъæу.
Æмтгæй ахæм программæйы руаджы районы фæфылдæр уыдзысты инвестицитæ, фæзындзысты куысты бынæттæ. Инвестициты иумæйаг бæрц хъуамæ уа 65 милуан сомæй фылдæр.
Æрæфы районы райрæзты тыххæй радзырдта муниципалон сконды сæргълæууæг Лæгкуты Омар. Ам нырма каст цæуы дыууæ къабазмæ – промышленность æмæ туризммæ. Зæдæлескы кæндзысты хохаг дуры куыст. Бæрзонд хохаг хъæутæй иуы та туристон комплекс, къæдзæхтыл бырыны фадæттимæ. 2021-æм азы ам фæзындзæн 55 ног кусæн бынаты.
Æмбырды рæстæг дыууæ районы курдиаттæ фидаргонд æрцыдысты.
