Амыдта йæ хицауады сæрдар Тускъаты Таймураз
Алагиры, Горæтгæроны æмæ Мæздæджы районты бюджетты уавæрыл æрныхас кодтой видеоконференцийы. Амыдта йæ хицауады сæрдар Тускъаты Таймураз. Фыццаджыдæр ныхас цыд муниципалон скондты сæйраг финансон документ снывыл кæныныл, хæрдзтыл æмæ æфтиæгтыл.
Стыр æргом аздæхтой, хи изоляцийы фæтк районты экономикæйыл куыд фæбæрæг, уымæ. Алагиры районы сæргълæууæг Бутаты Арсен куыд радзырдта, афтæмæй ныридæгæн зæххыты арендон фиддонты фарста лыггонд æрцыд. Ацы азы 1-æгæм маймæ æмхæццæ бюджеты хæрдзтæ систы 249 милуан сомы. Хицауады сæрдары хъуыдымæ гæсгæ ахсджиаг у æппынæдзухдæр мониторинг кæнын.
Горæтгæрон районы та, бынæттон бюджетæй куысты мызд чи исы, уыдонæн æй фидынц æнæ къуылымпытæй, загъта районы сæргълæууæг Есиаты Руслан. Уымæй дарддæр, зæххытæн арендæ исгæйæ, фæнд кæнынц афæдзы кæронмæ бюджет 90 милуан сомы онг фæхъæздыгдæр кæнын.
Мæздæджы районы сæргълæууæг Олег Яровоймæ та Тускъаты Таймураз фæсидт, цæмæй арфæйы ныхæстæ зæгъа бынæттон рынчындоны сæйраг дохтыр Бузойты Азæмæты номыл, коронавирусы инфекцийы ныхмæ ахадгæ мадзæлттæ кæй аразынц, уый тыххæй. Уымæй дарддæр Мæздæджы районы бæстон куыст цæуы, паддзахадон программæтæм хаст чи рцыд, уыцы объектты.
