Алыхуызон аххосæгтæм гæсгæ объект хæлын райдыдта, фæлæ йæ бантыст бахъахъхъæнын æмæ йын йæ фыццагон хуыз сног кæнын
Алагиры кæронмæ фæцис фыццаг ирон скульптор Едзиты Сослæнбеджы барельефтимæ къулы реставраци. Алыхуызон аххосæгтæм гæсгæ объект хæлын райдыдта, фæлæ йæ бантыст бахъахъхъæнын æмæ йын йæ фыццагон хуыз сног кæнын. Ацы хъуыддаг къухы куыд бафтыд, уый тыххæй бæлвырддæр радзурдзæн Хъайтмазты Дзерассæ.
Алагиры зымæгон парчы æрбынæттон ис Едзиты Сослæнбеджы сфæлдыстад. Бирæ азты дæргъы фыццаг ирон скульпторы куыстытæн фесæфынæй тæссаг уыд. Ныр культурон намысы объекттæ хъахъхъæныны республикон комитеты хъарутæй барельефтимæ къулæн фæзынд дыккаг цард.
1926-æм азы Едзиты Сослæнбег йæ хæлар Хосаты Хъамболаты хæдзары къул саив кодта дурын барельефтæй. Рæстæгимæ къул æрдзон аххосæгтæм гæсгæ хæлын райдыдта, фæстæдæр та йын уæвгæ дæр адæймаджы аххосæй ныппырх уæвынæй тæссаг уыд. Уымæ гæсгæ снысан кодтой объект Октябрьскийы уынгæй паркмæ рахæссын.
Фардзинты Хадзбатыр, Алагиры сæргълæууæг: «Уыдис скульптор. Тынг хъуыстгонд, ахсджиаг æрмæст нæ республикæйы нæ, фæлæ æппæт Уæрæсейы дæр. Тынг нæм фæкаст республикæйы сæргълæууæг Сергей Меняйло. Хæдзары къул мах парчы кæй сæвæрдтой, уый тынг æхсызгон у, тынг ахсджиаг бынат ахсы».
Хуымæтæг аивад арф фæлгонцтимæ. Едзиты Сослæнбеджы алы куыст дæр у мидисджын. Æрмдæсны сæнусон кодта дуры Хосаты бинонты фæлгонц – Хъамболаты, йæ бинойнаджы, сæ сывæллæтты, сæ сæрмæ та Лæгты дзуар хъахъхъæны бинонты фарн.Специалисттæ реставраци тынг лæмбынæг кодтой. Цыбыр рæстæгмæ сын бантыст къулы фыццагон хуыз сног кæнын, сфидар æй кодтой, цæмæй культурон намысы объект фылдæр фæлæууа.
Специалисттæм ма ис парчы зонæ дарддæр аив кæныны фæдыл хъуыды. Къулы фарсмæ ис скæнын культурон тыгъдад.
