Рацаразынмæ дзы хъавынц мæсгуытæ æмæ кувæндон
Уæлдæр куыд загътам, афтæмæй Алагиры районы хæххон хъæуты ныртæккæ цæуынц ахсджиаг куыстытæ. Рацаразынмæ дзы хъавынц мæсгуытæ æмæ кувæндон. Ирыстойнаг æмкусджытæм æххуысмæ ссыдысты мæскуыйаг специалисттæ. Радзырдтой сæ фæлтæрддзинады тыххæй, аныхас кодтой, мæсгуытæ кæй сты, уыцы мыггæгты минæвæрттимæ. Ахсджиаг у арæзтæдты раздæры хуыз бахъахъхъæнын. Зæгъдзыстæм ма уый дæр, æмæ æппæт куыстытæ цæуынц, Аланийыл саргъуыды 1100 азы боны программæ æххæст кæнгæйæ. Касаты Наирæ радзурдзæн бæлвырддæр хабæрттæ.
Мин æмæ 500 метрæй бæрзонддæр фæзуатыл куыст цæуы рагон мæсыг бахъахъхъæныны тыххæй. Ирон æрмдæснытæ мæскуыйаг реставратортимæ хъуыды кæнынц, Уæллаг Луары дурæй конд мæсыг бахъахъхъæныныл. 16-æм æнусæй фæстæмæ ам хæххон дымгæты хсæн баззади æрмæстдæр иунæг мæсыг æмæ уый дæр ис кæлæддзаг уавæры.
Хъахъхъæнæн мæсыг æвæрд ис Æрыдоны цæугæдоны тæккæ къардиуы. Специалисттæ зæгъынц, куыстытæ æнцон нæ уыдзысты, фæлæ сæм фæлтæрддзинад ис.
Донысæры мæсыг. Йе ддаг бакаст дæр æмæ мидæгæй дæр Ирыстонæн у æнахуыр. Мидæгæй дзы 5 уæладзыджы, иу сæ кодта дурæй конд асин, йе ддаг бакаст та аивгонд уыди декоры элементтæй. Ныр мæсыг хъæуы æвæстиатæй бахъахъхъæнын. Аланийыл саргъуыды 1100 азы сбæрæг кæныны фæлгæты ма специалисттæ снысан кодтой Хестанты æмæ Дзуттæгаты мæсыг бахъахъхъæнын дæр. Хуымæтæгдæр зæгъгæйæ та бацархайын хъæуы ууыл, цæмæй дарддæр мауал фехæла. Цæмæй йæ фидæны фæлтæртæ дæр феной, уый тыххæй. Куыстытæм бавналын хъæуы хæстæгдæр рæстæг, уымæн æмæ фæстаг цалдæр азы хъахъхъæнæн фæрæзы уавæр зынгæ фæцудыдта.
Дагомы æрдзы хъæбысы дæр ис, культурон нысаниуæг кæмæн ис, ахæм объект. 2017-æм азы йæ зæрдæхæлар адæм сæхи фæндонмæ гæсгæ сцалцæг кодтой, базылдысты йæм, фæлæ дзы йæ рагон элементтæй кæцыдæртæ сæфт æрцыдысты. Ныр фадат фæци, реставрацийы рæстæг объектæн йæ рагон хуыз раздахынæн.
Дагомы, Донысæры æмæ Луары мыггæгты минæвæрттимæ фембæлды рæстæг реставратортæ радзырдтой проектон æрхъуыдыдзинæдты тыххæй. Иууылдæр загътой сæ хъуыдытæ æмæ сæ фæндонтæ. Разæй сæм æнхъæлмæ кæсы бирæ куыстытæ, фæлæ сæм цæуынц разæнгардæй.
Аланийыл саргъуыды 1100 азы сбæрæг кæныны фæлгæты ацы аз республикæйы фæнд кæнынц, культурон нысаниуæг кæмæн ис, ахæм 14 объекты сцалцæг кæнын.
