Ныртæккæ та дзы фæллой кæнынц куыстуат «Дагспецсервисы»-ы специалисттæ
Алагиры районы Советон рæстæг цы тъунел сарæзтой, уый дзуапп нал лæвæрдта нырыккон домæнтæн. Ныртæккæ та дзы фæллой кæнынц куыстуат «Дагспецсервисы»-ы специалисттæ. Фыццаджыдæр аиуварс кодтой æппæт хъæндзинæдтæ. Бацархайдтой, цæмæй дзы хæххон дæттæ ма мбырд кæной, ууыл. Пайда кæнынц æппæт хъæугæ уæззау техникæйæ. Цы технологитæй æмæ арæзтадон æрмæгæй пайда кæнынц, уыдон дзуапп дæттынц æдасдзинады домæнтæн. Бæлвырддæр хабæрттæ радзурдзæн Джыбызты Зæринæ.
Къорд азы размæ, паддзахадон программæйы бындурыл, нæ республикæйы туризмы райрæзты нысанæн арæзт æрцыд рекреацион комплекс «Мамысон»-ы проект. Уый ахъаз уыдзæн нæ республикæмæ дунейы алы рæттæй фылдæр туристты æргом раздахынæн. Мамысонгомы æрдз рæсугъд у афæдзы алы афон дæр. Ирыстоны социалон-экономикон райрæзтæн хорз æмæ æнцонвадат фæндæгтæ сты сæйрагдæр рахæцæнтæй иу. Дзæуджыхъæуæй 80 километры æддæдæр Уæлладжыры коммæ куы бацæуай, уæд бахæццæ уыдзынæ рекреацион комплекс «Мамысон»-мæ фæндагыл тъунелы цалцæггæнæн- арæзтадон куыстытæм. Кæд хæхты мит æруарыд, уæддæр куыстытæ цæуынц æнæрлæугæйæ, æхсæвæй-бонæй. Цæгат Ирыстоны транспорты æмæ фæндаггон инфраструктурæйы комитеты хæслæвæрдмæ гæсгæ подрядон куыстуат «Дагспецстройсервис»-ы специалисттæ ног хуызы рацараздзысты, Мин фараст сæдæ æстайæм азы, Зæрæмæджы ГЭС-ы арæзтады рæстæг кæй бакъæртт кодтой, уыцы тъунел. Участокы хицау Абдурахман Абдуллаев фæлтæрд у ацы куыстыты, йæ ныхасмæ гæсгæ, тъунел куы сцæттæ уа, уæд нымад уыдзæн республикæйы хуыздæр объектæй иуыл.
Проектмæ гæсгæ тъунелы уыдзæн электрон рухсытæ, вентиляци æмæ видеоцæстдарды системæтæ. Кæрæй-кæронмæ уыдзæн асфальтæй æмбæрзт, сфидаудзæн фæндаггон нысантæй. Арæзтады кусы æстай адæймаджы онг – экскаваторты æмæ уæзласæн машинæты шофыртæ, арматурщиктæ, æндадзджытæ. Кæд куыстытæн дзуапдæттæг дагестайнаг компани у, уæддæр сæ фылдæр сты бынæттон цæрджытæ.
Куыд базыдтам, афтæмæй бригадæтæ кусынц, «вахта» кæй хонынц, ахæм хуызы – фынддæс боны, стæй та иу уыйбæрц баулæфынц. Куыстуаты хардзæй сын кæнынц хæринаг, цæргæ дæр рæстæгмæ ам кæнынц. «Дагспецстройсервис»-ы сæйраг инженер Зубайри Солимановы ныхасмæ гæсгæ, æппæт арæзтадон æрмæг, уыимæ, бетоны фидардзинад æмæ хæрзхъæддзинад дæр иртасынц сæрмагонд лабораторийы. Бадзырдтæм гæсгæ сæ бынатмæ ласынц Краснодарæй, Ростовæй, Дагестанæй, Дзæуджыхъæуæй. Бетон цæттæ кæнынц Мызуыры æмæ Буроны. Ныртæккæ та уал адæм пайда кæнынц, Зæрæмæджы ГЭС-ы доны сæрты рæстæгмæ цы хид сарæзтой, уымæй.
