Дзæуджыхъæуы дарддæр йæ куыст кæны этнолагерь. Байгом дзы дыккаг фæлтæр.
«Алайнаг фæд» иу кæны алы рæтты цæрæг ирæтты. Дзæуджыхъæуы дарддæр йæ куыст кæны этнолагерь. Байгом дзы дыккаг фæлтæр. Йæ архайджыты зонгæ кæнынц нæ рагфыдæлты традицитæ æмæ æгъдæуттимæ. Æвдисынц сын, Ирыстон хъуыстгонд цы æрдзон бынæттæй у, уыдон дæр. Фæсарæнты цæрæг ирæтты зæрдæмæ тынг цæуы ахæм лагерь. Зæгъынц, ногæй та кæй æрбацæудзысты сæ райгуырæн бæстæмæ. Йæ фыдæлты культурæ зонын кæй фæнды, уыцы адæмимæ базонгæ не сфæлдыстадон къорд дæр.
Райгуырд æмæ схъомыл Францийы, фæлæ æдзух йæ зæрдыл дардта, Ирыстонæй рацæугæ кæй у, уый. Джан Удку йæ рагфыдæлты зæххыл фыццаг хатт ис. Базонгæ йæ хæстæджытимæ æмæ бæллы, раздæр цы хæзнаты кой хъуыста, уыцы бынæттæ йæхи цæстытæй фенынмæ.
Этнолагерь Ирыстоны æрæмбырд кодта æппæт дунейы цæрæг ирæтты. Козаты Владимирыл 14 азы куы цыд, уæд ахуыр кæнынмæ ацыд Швейцаримæ. Æргомæй зæгъы, æппæтæй тынгдæр кæй мысы нæ национ хæринæгтæ. Суанг ма йæхæдæг фæлвæрдта уæливыхтæ фыцын дæр, фæлæ йæм фæлтæрддзинад нæй.
Гаглойты Лианæ лагерьмæ æрбацыд Уралы цæрæг ирæттимæ. Ныр 20 азы цæры Екатеринбурджы æмæ зоны, куыд ахсджиаг у кæстæртæм национ традицитæ æмæ æгъдæуттæ хæццæ кæнын. Зæгъы, цæрæн ис зæххы къорийы цыфæнды ран дæр, фæлæ сафæн нæй патриотон хъомылад.
Ацы аз этнолагерь суазæг кодта 50 æмзæххонæй фылдæр. Æмбæлдысты сыл 2 къæпхæны. Лагеры сæйраг уагæвæрдтæй иу у алкæимæ дæр хицæнæй бакусын. Кæсынц кæмæ цы фарстатæ ис, кæй цы фæнды базонын. Архайынц мадæлон æвзаг, национ кæфтытæ æмæ æгъдæуттыл ахуыр кæнын сеппæты, фæлæ нæ фыдæлтæ æнусты сæрты цы фарн хæссынц, уый иу къуыримæ нæ раиртасдзынæ. Æмæ та уæд ссæуынц ногæй.
Лагеры архайджытæ семæ канд рæсугъд æнкъарæнтæ æмæ зæххы хай нæ ахæссынц, фæлæ ма сфидар кæнынц хæлар ахстдзинæдтæ. Иудзинад та у этнолагеры сæйраг нысантæй иу.
