Клубы разамынд сæ фидæны куысты пъланы тыххæй радзырдта журналисттæн
«Алани»-йы футболисттæ æрбаздæхтысты æмбырдтæй æмæ дарддæр сæхи цæттæ кæнынц Футболон национ лигæйы архайынмæ. Клубы разамынд сæ фидæны куысты пъланы тыххæй радзырдта журналисттæн. Бæлвырд хъуыддæгтыл нырма раджы у дзурын, фæлæ архайдзыстæм алы матчы дæр хорз бæрæггæнæнтæ равдисыныл, загъта клубы вице-президент Гуыриаты Данил.
Сæйраг темæ уыди «Алани-Дзæуджыхъæу»-ы клубы футболон национ лигæмæ ракæнын.
Командæ æмæ йæ разамынд сæ зæрдæ дардтой хуыздæр фидæныл. Уымæн сын уыди æппæт гæнæнтæ дæр. Бирæ уæлахизты фæстæ пандемийæйы ыххæй чемпионат баурæдтой, æмæ Алани баззади турнирон таблицæйы дыккаг бынаты. Ацы хъуыддагыл цыди бирæ ныхас æмæ куыст. Æппынфæстаг клубæн бантысти баууæндын кæнын, «Алани-Дзæуджыхъæу» уæлдæр æмвæзады аккаг кæй у, ууыл. Сæйраг тренер Гогниты Спартачы ныхæстæм гæсгæ, ныртæккæ сæйрагыл нымайынц, цæмæй сыл футболуарзджыты сæ зæрдæ ма сивой, æмæ национ лигæйы равдисой хорз бæрæггæнæнтæ. Клубы разамонæг куыд зæгъы, афтæмæй спортсментæн ис æппæт уавæртæ æмæ гæнæнтæуымæн.
Клубы разамынды ныхæстæм гæсгæ, командæйы цæхгæр ивддзинæдтæ нæ уыдзæни. Æнгом командæ æвдисы хорз бæрæггæнæнтæ, зæгъы клубу вице-президент Гуыриаты Даниил.
Командæйы уæнгтæ стыр бузныг сты клуб «Ахмат»-æй, уый «Алани»-йæн радта бар, йæ стадионæй спайда кæнынæн ,стадион «Спартачы» реконструкцийы тыххæй сæ бон сыййаг фæзы архайын куы нæ уа, уæд. Пресс-конференци цыди «Спартачы» трибунæты бын залы. Уым дæр ныридæгæн цæуынц активон цалцæггæнæн куыстытæ.
Трибунæйы хуссайраг æмæ цæгатаг фæрстæ æххæстæй сног кæндзысты, скæсæйнаг трибунæ райхалдзысты æмæ йæ ногæй сараздзысты нырыккон домæнтæ æххæстгæнгæйæ. Футболуарзджытæн æхсызгон хъусынгæнинаг у уый, æмæ стадионы уыдзæни раздæры бæрц бынæттæ. Цæуы дзы 30 мин адæймаджы. Федералон программæмæ гæсгæ, 3 азы размæ, «Спартак» райста рог атлетикæйæн профессионалон дугъгæнæн фæз. Ныртæккæ республикæйы алы кары æмæ æмвæзады спортсентæн у сæйрагдæр бынат. Рацарæзты рæзтæг фæзмæ нæ бавналдзысты. Уымæй уæлдай дзы спортсментæн арæзт æрцæудзæнис уæлæмхасæн уавæртæ.
Трибунæты æмæ агъуыстыты рацарæзт кæронмæ кæд фæуыдзæнис, уый бæрæг нæма у. Фæлæ сентябры астæу стадионы «Алани»-йы фыццаг матч кæй ацæудзæн, уый бæлвырд у. Уæд, рæстæгмæ спайда кæнæн уыдзæни скæсæйнаг трибунæйæ.
