Зындгонд эстрадон зарæггæнæг архайдзæн бæрæгбоны концерты
Алексей Чумаков Цæгат Ирыстоны цæрджытæн арфæ ракæндзæн республикæйы æмæ горæты боны фæдыл. Зындгонд эстрадон зарæггæнæг архайдзæн бæрæгбоны концерты. Уый тыххæй журналисттæн фехъусын кодта Дзæуджыхъæуы культурæйы управленийы хицау Мæрзойты Руслан. 22-æм сентябры ма Сæрибары фæзы концерты фенæн уыдзæни ирон эстрадæйы зарæггæнджыты. Уæ зæрдыл уын æй лæууын кæнæм, бæрæгбоны мадзæлттæ цæудзысты 21-æм æмæ 22-æм сентябры. Сабаты Терчы былгæрон фæлладуадзæн фæзы уыдзæни ирон чъириты æмæ цыхты фестиваль. Уымæй уæлдай арæзт æрцæудзæни конкурс «Ирон бæгæны»-йы горæтаг къæпхæн. Дыккаг бон фылдæр мадзæлттæ цæудзæни Сабырдзинады проспекты, Центрон парчы æмæ Сæрибары фæзы. Горæты астæу ацæудзысты 10 фестивалы – вокалон, хореографон, театралон æмæ æндæртæ. Уыдзæни дзы цалдæр мызыкалон фæзы, сæ бон дзы архайын уыдзæни кæй фæнда, уыдонæн. Дыууæ боны Штыбы фæзы кусдзæни гом арвы бынмæ кинотеатр дæр. Кæронбæттæны та ар ныррухс уыдзæни ирд ахорæнтæй фейерверкæй.
