Фæсивæды алы концерт дæр, уæлдайдæр та республикæйы арæнтæм куы ацæуынц, уый вæййы æнæхъæн цау
Этникон æмæ нырыккон хореографи, вокал, адæмон инструменттæ, нывкæнынад æмæ æрмдæсныйад… Дзæуджыхъæуы уæлæмхасæн ахуырады Центры 10 мин хъомылгæнинагæй фылдæр равдыстой сæ зонындзинæдтæ, ахуыры азы хатдзæгтæм гæсгæ. Дзуапдæттæн концерты сæйрагдæр сси патриотизмы, историйы æмæ фыдыбæстæмæ уарзондзинады темæ. Ирддæр архайджытæй иу уыд адæмон кафты ансамбль «Æрфæн». Радта 33-æм хатдзæгтæгæнæн концерт. Касаты Наирæ радзурдзæн бæлвырддæр.
Æнгом æмæ æмдыхæй – фæскулисæты æмæ сценæйы уый хуымæтæг девиз нæу, фæлæ адæмон кафты ансамбль «Æрфæн»-ы артистты закъон. Сæ разамонæг Мурасты Зæринæйы ныстуантæ зæрдæйы ахсынц арф бынат.
Хатдзæгтæгæнæн концерт æхгæны кафджыты къорды 33-æм сезон. Зын, фæлæ уыцы иу рæстæг æгæрон тых кæм ис, ахæм кафт «Хохаг» домы акробатикæйы сæрмагонд элементтæ. Мингай цæстытæ æмæ софитты рухсытæ. Абон сценæйы сты дебютанттæ. Кæй зæгъын æй хъæуы мæт кæнынц.
Чызджытæ дæр сæхи цæттæ кæнынц гримгæнæн уаты. Хæмыцаты Евæ кæны рзминкæ.
Чызгыл цæуы æрмæст 9 азы, ансамбльмæ æрбацыди æртæаздзыдæй, йæ хистæр æфсымæрмæ гæсгæ. Фидæны йæхи уыны æрмæстдæр сценæйы.
Кафтмæ уарзондзинад ис алы артисты зæрдæйы дæр. Ацы сфæлдыстадон къордты кафджыты династитæ гыццыл нæй. Владислав Конишев у солист. Зæгъæн ис, æмæ схъомыл сценæйы. Йе фсымæримæ коллективы сты 15 азæй фылдæр.
Аивадуарзджытæ никуы базондзысты, кафджыты алы рацыдыл æмæ алы фезмæлдыл дæр цас куыст цæуы, уый. Репетициты дæр цыма бæрнон концерты вæййынц, афтæ сæхи фенкъарынц. Уымæн æмæ сæ алкæйы раз дæр ис нысан, адæмы размæ иттæг хорз кафт рахæссын. Уæвгæ та, ансамблы ис сæхи фæтк, зонынц æмæ йæ æххæст кæнынц æрмæстдæр ансамблы уæнгтæ.
Лæппутæм дæр къаддæр домæнтæ нæй. Æнæниз уæвын, хæрдæй хиуыл хæцын, æмæ адæймаджы уæзмæ цæстдарын – афтæмæй ис гæнæн сценæйы бирæ азты бакусын.
Кафт ахæссы рекордон 8 минуты. Ацы постановкæйы дæр æнæхъæн дуне, æмæ уымæй артист фæндаг ары аивадуарзджыты зæрдæтæм.
Фæсивæды алы концерт дæр, уæлдайдæр та республикæйы арæнтæм куы ацæуынц, уый вæййы æнæхъæн цау. Аивадуарзджыты размæ хæссынц æппæт Цæгат Кавказы кæфтытæ. Ам алцыдæр, уæлæдарæсæй райдай æмæ æндæр лыстæг хъуыддæгтæй фæу, дзуапп дæттынц этникон æмæ историон æцæгдзинæдтæн.
Мурасты Зæринæ арæхстджынæй баиу кодта фольклор, классикон балет, æмæ акробатикæ. Афтæ, Зæринæйы тыххæй фыстой ныгуылæн бæстæты рауагъдадтæ. Уый у йе сфæлдыстадон хицæндзинад. Цы кæфтытæ сæвæры, уыдон базонæн вæййы се нæбафæзмгæ хицæндзинæдтæй. Йæхицæн уыди стыр æмæ цымыдисаг аивадон фæндаг. Ногдзауты Галуаны гыццыл солисткæйæ, суанг республикон сценæйы артисткæйы онг. Æнхъæлмæ йæм касти бæллиццаг сфæлдыстадон фидæн, фæлæ равзæрста æндæр фæндаг. Ныфсхаст æмæ стыр зæрдæйы хицау, удыхъæдæй фидар адæймаг 90-æм азты райдиан бындур сæвæрдта сывæллæтты адæмон кафты ансамбль Æрфæн-æн. Йæ куыстмæ йе стыр уарзондзинады фæрцы уал азмæ йæ къухы бафтыди стыр æнтыстдзинæдтæ. Æртын азæй фылдæр дунейы хуыздæр сценæтæ, адæмы уарзондзинад, аивады бæрзонд къæпхæнтæ… Сæдæгай ирд постановкæтæ… Иннæты хсæн дарынц бæрæг…Дунейы картæйыл зын ссарæн у ахæм бæстæ, ансамбль кæм нæ уыди, стæй цы хæрзиуджытæ нæ райста, ахæмæ. Абон дæр афтæ. Аивадуарзджыты зæрдæтæ дзыг сты æгæрон æхсызгон æнкъарæнтæй.
Сфæлдыстадон къорды рагон фæтк у, сценæйы æнкъарæнтæ рахæссынц фæскулисæтæм дæр. Æппæты къаддæр артисттыл æмбæлынц уæлдай æхсызгондæрæй.
Æвзонг артистты фыццаг концертмæ, кæй зæгъын æй хъæуы, æрбацыдысты сæ ныййарджытæ æмæ хиуæттæ дæр.
Аивады тых æгæрон у. Сæрды каникулты рæстæг сæ аивад кæм æвдисдзысты, уыцы горæты номхыгъд дæр ныридæгæн у бæлвырд. Цæгатæй хуссармæ, ныгуылæнæй скæсæнмæ бирæ горæттæ æмæ дæсгай концерттæ.
Ансамбль «Æрфæн» арæх фæхонынц ирон культурæйы минæвар дунейы. Æмæ кæд алы кафт дæр цард у, уæд алы концерт та йæ мидис.
