Уымæй дарддæр ма сси сæрмагонд приз «Хуыздæр национ костюмы» хицау.
Цæгатирыстойнаг адæмон кафты ансамбль «Арфан» рамбылдта гран-при æппæтадæмон фольклорон фестиваль «Витоша-2019»-ы. Уымæй дарддæр ма сси сæрмагонд приз «Хуыздæр национ костюмы» хицау. Æппæтадæмон фольклорон фестиваль «Витоша» 23-æм хатт арæзт æрцыд Софияйы. Ацы аз культурон мадзалы архайдтой музыканттæ, кафджытæ æмæ зарæггæнджытæ 11 паддзахадæй. Се хсæн Мексикæ, Казахстан, Турк, Перу, Япони, Босния æмæ Герцеговинæ, стæй æндæр бæстæтæй. Ирыстойнаг коллективæн разамынд дæтты Мурасты Зæринæ. Ацы хатт архайдта цалдæр номинацийы æмæ сси хуыздæрыл нымад. Фæлæ сын ахæм æнтыстдзинад фыццаг хатт нæу. Ирон аивад рагæй бауарзын кодтой фæсарæйнаг культурæ уарзджытæн. Болгарийы гран-при сын фæхъæздыгдæр кодта сæ хæрзиуджыты къæбиц. Алы аз дæр ансамбль «Арфан» нæ республикæйы кад фæхъахъхъæны алы бæстæты æппæтадæмон фестивальты. Ныридæгæн се сфæлдыстадæй барухс кодтой Францийы, Испанийы, Италийы æмæ Турчы цæрджыты зæрдæтæ. 2020-æм азы коллективыл æххæст кæны 30 азы. Хæстæгдæр рæстæг ансамбль нысан кæны сæрмагонд программæ бацæттæ кæнын, æмæ сæхи концерт Дзæуджыхъæуы равдисын.
