Æрæфы районæй коллектив архайдта номинаци “Оркестр”-ы
Ансамбль “Мелодия гор” сси Æппæтуæрæсеон фестиваль «Душа баяна»-йы дыккаг къæпхæны лауреат. Æрæфы районæй коллектив архайдта номинаци “Оркестр”-ы. Æдæппæтæй дзы уыди 7 мин архайæджы нæ бæстæйы алы регионтæй. Фестиваль арæзт æрцыд культурон хъæппæристы Президентон Фонды æххуысæй. Чехойты Фатимæ радзурдзæн бæстондæр.
Алы змæлд дæр, суанг ма цæстæнгас дæр – ныфсджынæй. Ансамбль «Мелодия гор» цæттæ кæны радон равдыстмæ. Сæ сæйрагдæр рауади æнтыстджын – коллектив фестиваль «Душа баяна»-йы сси 2-аг къæпхæны лауреат. Солисткæ Тегаты Лидæ 13 азы цæгъды фæндырæй. Уыцы музыкалон инструменты равзæрст уыд йæ зæрдæйы фæндон. Æхсызгон уыд ахæм кадджын фестивалы лауреат суæвын, зæгъы Лидæ.
Ансамбль «Мелодия гор» – æрыгон коллектив у. Фæзынд 2019 азы. Уæд фидæны артистты баиу кодта музыкæмæ æмæ адæмон зарæгмæ уарзондзинад. Культурæйы кусджытæ æмæ медицинон хотæ сты йæ уæнгтæ. Алчидæр сæ йæ куысты у дæсны специалист. Уæгъд рæстæг та свæййынц музыкалон бинонтæ. Æппæтуæрæсеон фестиваль «Душа баяна»-мæ цæттæ кодтой бæстон.
Фестивалы кæронбæттæн ацы аз ацыд Мæскуыйы. Сæдæгай коллективтæ æмæ зарæггæнджытæ ссыдысты бæстæйы алы регионтæй. Соло, оркестр, ансамбль æмæ авторон композицитæ – архайджытæ сæ арæхстдзинад æвдыстой цалдæр номинацийы. Конкурсы нысан у адæмон инструменттыл цæгъдыны традицион аивад бахъахъхъæнын. Æрмæст ерыс нæ уыд, фæлæ алыхуызон культурæты фембæлд.
Фестивалы 2-аг бынат ансамблæн ныридæгæн у йе стырдæр хæрзиуæг. Фæлæ музыканттæ сæхæдæг куыд зæгъынц, уымæ гæсгæ коллектив ныр ма ис æгæрон сфæлдыстадон фæндаджы райдиан. Кæд къорд æрыгон у, уæддæр æм ис хæрзиуджытæ. Ныртæккæ йæ уæнгтæ сæхи цæттæ кæнынц ног фестивальтæм. Тагъд рæстæг хъуамæ курдиат бадæттой онлайн-конкурсы архайынмæ. Уым дæр, æнæмæнгæй, уыдзысты хуыздæрты номхыгъды.
