Ахæм уынаффæ хаст æрцыд хицауады æмбырды
Апрелы кæронмæ Цæгат Ирыстоны скъолатæ райсдзысты республикæйы сæргълæууæджы гранттæ 60 милуан сомæн. Фæрæзтæ радих кæндзысты педагогты фиддонтыл. Ахæм уынаффæ хаст æрцыд хицауады æмбырды. Сæйраг æвзарæн домæн – паддзахадон хатддзæгæтæгæнæн аттестаци, олимпиадæты, командон ерысты, профессионалон дæсныйады чемпионатты æмæ регионалон проектты архайд. Уымæй дарддæр ма хицауады æмбырды фехъусын кодтой, профессионалон дæсныйады конкурс «Афæдзы педагог»-ы иумæйаг призон фонд уыдзæн 4 милуан сомы. Конкурс расидти республикæйы хицауад. Цæудзæн 10 номинацимæ гæсгæ. Æппæт номинациты уæлахиздзау хорзæхджынгонд æрцæудзæн дипломæй æмæ 1 милуан сомæй. Хицауады æмбырды ма хаст æрцыд уынаффæ, бæхты драмон театр «Нартæн» Уæрæсейы аивæдты сгуыхт архайæг, Цæгат ирыстоны адæмон артист Дзиуаты Анатолийы ном раттыны тыххæй. Цæгат Ирыстоны сæргълæууæг Сергей Меняйло куыд загъта, афтæмæй Дзиуаты Анатолий уыд бæхты театры бындурæвæрæг æмæ фыццаг аиавадон разамонæг. Йæ курдиат æмæ æнæзæрдæхудт фæллойы фæрцы сæмбырд кодта тыхджын æмæ рæсугъд фидæнмæ бæллаг фæсивæды, афтæмæй рауад курдиатджын сфæлдыстадон къорд. Абоны онг дæр труппæ нымад у иунæг ахæм коллективыл, не стыр бæстæйы.
