Рауагъдады фыст сты дыгурон æхсæнады хъæуты бинонты хыгъдтæ. Се ппæт дæр ист сты адæмы æрфысты хатдзæгтæм гæсгæ
Арæзт æрцыд чингуыты сери «Ирыстоны архивон фонд»-ы 9-æм томы презентаци. Цæгат Ирыстоны архивон службæ, республикæйы Центрон паддзахадон архив, стæй Æрæфы районы администраци бацæттæ кодтой рауагъдад «Посемейные списки населенных пунктов Владикавказского округа Терской области на 1886 год»-ы фарæстæм том. Рауагъдады фыст сты дыгурон æхсæнады хъæуты бинонты хыгъдтæ. Се ппæт дæр ист сты адæмы æрфысты хатдзæгтæм гæсгæ. Чиныг дзурæг у бинонты уæнгтыл, сæ диныл, исбоныл æмæ архайдыл. Ацы мыхуыры фæрæз пайда уыдзæн канд наукæйы архайджытæн нæ, фæлæ ма æндæр адæмæн дæр. Уæлдайдæр та – йæ мыггаджы равзæрды тыххæй фылдæр базонын кæй фæнды, уыдонæн. Чиныджы тираж у 300 экземпляры. Арвыстой сæ республикæйы æппæт районты библиотекæтæм.
