Схонæн æй ис, æвзаг зоныны фæндагыл цæуæгæн лæвар
Ног æвæрæн Ирыстоны чингуыты хæзнадонмæ. Арæзт æрцыд дыгурон æвзаджы хæдахуыргæнæн чиныджы презентаци. Схонæн æй ис, æвзаг зоныны фæндагыл цæуæгæн лæвар. Чиныгæн презентаци арзæт æрцыд республикæйы национ наукон библиотекæйы, стæй Дигорайы æмæ Цыколайы. Презентациты архайджытæ дзырдтой Тахъазты Фидары лæмбынæг куыстытæй иуы тыххæй. Сосранты Жаннæ радзурдзæн бæлвырддæр хабæрттæ.
Дыгурон æвзаджы хæдахуыргæнæн чиныджы презентацийы, йæ автор, бирæ хæрзиуджыты аккаг кæмæн сты йæ уды конд æмæ йæ бирæ фæллæйттæ, уыцы филологон зонæдты доктор Тахъазты Федарыл Цæгат Ирыстоны Хицауады сæрдæры хæдивæг Платы Альбинæ, арфæйы ныхæстимæ, сæмбæлын кодта республикæйы сæргълæууæджы номæй арфæйы гæххæт.
Бирæтæ рагæй кæмæ æнхъæлмæ кастысты, уыцы чиныг адæммæ хаст æрцыд, национ наукон, Цыколайы чиныгдоны, стæй Дигорайы бынæттон администрацийы. Чиныджы рацыд се ппæтæн дæр ныфс радта, æвзаг фидæны фæлтæртæмæ хæццæ кæнынæн хорз фæрæз кæй суыдзæн, уымæй.
Ацы мадзал сси Дыгурон æвзаджы историон цау. Цæмæй Ирыстоны чингуыты хæзнадоны фæзындаид, ууыл стыр куыст бакодта филологон наукæты доктор , профессор Тахъазты Валерий. Фæлæ алы рæстæджы дæр фæндтæ æнæ материалон æххуысæй, царды сæ бынат нæ арынц. Уыцы хæс та йæхимæ райста фыдæлты сомбонмæ, йæ мадæлон æвзаг æмæ традициты фидæнмæ, куыдфæндыйы цæстæй чи нæ кæсы, уыцы Боллоты Хъазбеджы фырт Таймураз.
Ацы чиныджы ахадындзинады кой ныртæккæ зын кæнæн у, йæ автор куыд зæгъы, афтæмæй 20 азы размæ ирон æвзаджы хуæдахуыргæнæн чингуытæ, уæд бирæтæ дзырдтой, цæмæй ахæм рауагъд арæзт æрцæуа дыгурон æвзагæн дæр.
Презентацийы рæстæг Дзасохты Музаферы куыд загъта, афтæмæй ацы хъуыддаг царды йæ бынат ссардта, уый фидæны фæлтæртæн у стыр лæвар.
Чиныг уагъд æрцыд 500 экземплярæй. Презентацийы рæстæг, йæ архайджытæй алчи дæр фæхайджын, дыгурон æвзаджы хæдахуыргæнæн чиныгæй, уыимæ – лæвар. Йæ рауадзæджы нысан дæр уыд уый, мыхуыры фæрæз байуарын адæмæн, балæвар æй кæнын скъолатæн, чиныгдæттæн. Боллоты Таймураз ма, дзыллæтæн цы лæвар скодта, уымæй уæлдай æхцайы преми саккаг кодта йæ автор Тахъазты Федарæн.
Мадзалы архайдтой Ирыстоны хицауады, æхсæнадон организациты, скъолаты, мыхуыры фæрæзты, стæй дины минæвæрттæ. Раст фæзæгъынц – æвзаг адæмы иугæнæг у, ацы чиныджы презентаци , уымæн уыд æвдисæн.
