Куыд ма уын хъусын кодтам, афтæмæй æнæхъæн къуыри Цæгат Ирыстоны цыди фыццаг æппæтуæрæсеон театралон фестиваль «Вахтангов. Путь домой». Йæ программæ уыд хъæздыг æмæ цымыдисаг. Фестиваль фæци стыр æмæ ирд мадзалæй. Кæронбæттæны Тæбæхсæуты Балойы номыл Ирон академион театры равдыстой Кокайты Тотразы пьесæмæ гæсгæ æвæрд спекталы премьерæ «Гæздæнтæ». Евгений Вахтанговы номыл Уырыссаг Академион театры сценæйы та æвдыст æрцыд спектакль «Василий Теркин», Александр Твардовскийы уацмысмæ гæсгæ. Театрдзауты размæ йæ рахаста Ломоносовы номхæссæг Архангельскы драмæйы театр. Спектакльы нысан – Фыдыбæстæйы Стыр хæсты хъайтар Василий Теркины тыххæй радзурын. Не сфæлдыстадон къорд бакаст спектакльмæ. Бæлвырддæр хабæрттæ радзурдзæн Чехойты Фатимæ.
Хæдзары цар æмæ дзаумæттæ сæхи историимæ. Уыдоны *хсæн хъайтартæ ссардтой Александр Твардовскийы чиныг. Фæсивæд райдыдтой поэмæ «Василий Теркин»-ы текстмæ гæсгæ спектакль æвæрын. Уацмыс сæм ахæм цымыдисаг фæкаст æмæ, æнæнхъæлæджы, сæхæдæг систы йæ персонажтæ. Спектаклы хъуыды хуымæтæг нæу. 3 актеры бакуыстой салдат Василий Теркины ролыл.
Режиссер ахæм хъуыдымæ хуымæтæджы не *рцыд. Спектаклы автор постановкæмæ бахаста йæхи истори. Æртæ Василий Теркины, Фыдыбæстæйы Стыр хæсты йæ бинонтæй цы æртæ хистæры архайдта, цыма уыдон сты. Афтæ, режиссер Алексей Ермилышев кад кæны йæ хæстæджытæн, хæсты быдырæй чи нал сыздæхт, фидæны фæлтæртæн сабырдзинад чи балæвар кодта, уыдонæн. Постановкæ ма цымыдисаг уымæй уыд æмæ æвæрд æрцыд æнахуыр хуызы. Режиссер равзæрста реставрацийы хуыз.
«Василий Теркин»-ы премьерæ уыд 2015 азы майы. Уый уыд режиссеры дипломон куыст. Спектакль сси фестиваль «Подмосковные вечера»-йы лауреат. Фестиваль «У Троицы»-йы архайды тыххæй та йын саккаг кодтой сæйраг приз. Хаст æрцыд федералон проект «Театральная Россия»-йы программæмæ.
М.В. Ломоносовы номыл Архангельскы драмæйы театр Дзæуджыхъæцуы ис фыццаг хатт, фыццаг æппæтуæрæсеон театралон фестиваль «Вахтангов. Путь домой» – йы архайынмæ. Уæрæсейы театрты хуыздæр драмон спектакльтæм æмæ театралон аивадмæ цымыдис æвзæрын кæнын уыд фестивалы сæйрагдæр хæстæй иу. Спектакль «Василий Теркин» фенынмæ билеттæ æлхæд æрцыдысты суанг февралы.
Спектакль «Василий Теркин» у Фыдыбæстæйы Стыр хæсты хъайтарты нæмттæ зæрдылдарыны фæлварæн. Фыццаг театралон фестиваль «Вахтангов. Путь домой» кæронмæ æрхæццæ. Уый балæвар кодта Цæгат Ирыстоны цæрджытæн æмæ уазджытæн бирæ зæрдæбын æнкъарæнтæ æмæ æхсызгон фембæлдтытæ.
