Архайдтой дзы æвзонг спортсментæ Башкортостанæй, Тæтæры республикæйæ, Сант-Петербургæй, Ростовы облæстæй æмæ æндæр регионтæй. Се хсæн уыдысты дзæуджыхъæуккаг спортсменкæтæ дæр.
Æмæ сæхи равдыстой хорзæй. Хоситы Зæринæ, Тегкаты Линдæ, Цыбырты Камилæ æмæ Ольша Вавилова командон ерысты рамбылдтой бронзæ майдан. Куыд зæгъынц, афтæмæй сын æнцон нæ уыд, фæлæ кæрæдзиуыл æнгом кæй хæцыдысты æмæ иу иннæйы бæрæггæнæнтæ фæхуыздæр кæныныл кæй архайдта, уый фæзынд кæронбæттæн хатдзæгтыл. Стыр бузныг сты сæ тренер Людмила Щербичæй.
Хоситы Зæринæ æмæ Тегкаты Линдæйæн сæ кармæ гæсгæ ацы ерыстæ уыдысты фæстаг – ныр архайдзысты юниорты хсæн. Сæ размæ æвæрынц ног хæстæ. Сæ сæххæст кæнын сын кæй бантысдзæн, уый дызæрдыггаг нæу.
Се спортивон цæттæдзинад бæрзонд кæй у, уымæн æвдисæн сты фарон ноябры Словакийы Цыбырты Камилæ æмæ Хоситы Зæринæ сызгъæрин майдантæ кæй рамбылдтой, уый.
