Программæйы домæнтæм гæсгæ, хъуамæ 5 азы бакусой хъæуккаг скъолайы
Ацы ахуыры аз сæ профессионалон хæстæ æххæст кæнынмæ бавнæлдтой хъæуты кусæг ахуыргæнджытæ. Программæйы домæнтæм гæсгæ, хъуамæ 5 азы бакусой хъæуккаг скъолайы. Уый та уыцы-иу рæстæг цалдæр фарстайы лыг кæны. Сæйрагдæр – ахуыргæнæндон æххæст кæны педагогон кадртæй. Уæлæмхасæн та сæ алкæмæн дæр бафидынц милуан сомы. Уыдонæй ахуыргæнджытæ спайда кæнынц сæхи фæндонмæ гæсгæ. Зæгъæм, Кæрдзыны скъолайы кусæг Тотраты Кристинæ уыцы фæрæзтæй фæхуыздæр кодта йæ цæрыны уавæртæ. Бæлвырддæр радзурдзæн Фидараты Маринæ.
Тотраты Кристинæ фыццæгтимæ райдыдта, программæ «Земский учитель»-мæ гæсгæ кусын. 5 азы фæкуыста Дзæуджыхъæуы скъолатæй иуы. Фæлæ ног программæйы тыххæй куы фехъуыста, уæд æй æвæстиатæй бафæндыд уым бацархайын. Йæхæдæг куыд зæгъы, афтæмæй йæхицæн ахæм уынаффæ рахæссыны размæ алы хъуыддагыл дæр бæстон ахъуыды кодта. Уымæн æмæ уыцы мгъуыдмæ сахуыр и йæ коллективыл, сæйрагдæр та йæ ахуыргæнинæгтыл. Куыд фæзæгъынц, афтæмæй фæуæлахиз дæсныйадмæ уарзондзинад. Конкурсы бацархайыны размæ Кристинæ йæхи дæр æмæ йæ хиуæтты баууæндын кодта, кæй фæуæлахиз уыдзæн, ууыл.
Хъæуты кусæг ахуыргæнджыты дæсныйад тынг кадджыныл нымад уыд 19-æм æнусы кæронæй фæстæмæ. Фæлæ уыцы рæстæг дæсныйады минæвæрттæ паддзахадæй уæлдай æххуыс не нкъардтой. Ныртæккæ та, программæ æххæст кæнгæйæ, хъæуты кусæг ахуыргæнджытæн фидынц милуан сомы. Зæгъæм, Тотраты Кристинæ уыцы æхцатæй фæхуыздæр кодта йæ цæрыны уавæртæ. Дзæуджыхъæуæй Кæрдзынмæ цæуын дæр æм зын хъуыддаг нæ кæсы. Куысты дæм дæ уарзон ахуырдзаутæ куы фенхъæлмæ кæсынц, уæд уымæн аргъ нæй, æмæ цыфæнды зындзинæдты сæрты дæр æнцонтæй ахиздзынæ, зæгъы æрыгон ахуыргæнæг.
Ацы аз сбæрæг кодтой цалдæр ахуыргæнæджы, æмæ сæ кусынмæ арвыстой хъæуккаг скъолатæм. Æдæппæтæй сты 60 адæймаджы. Ныртæккæ нæ фаг кæнынц англисаг æмæ уырыссаг æвзаджы, стæй математикæйы ахуыргæнджытæ. Кировы районы та цух æййæфтой райдиан кълæсты ахуыргæнæгæй. Ахсджиаг сын уыди, цæмæй йæ, фыццаджыдæр, сабитæ бауарзой, уый.
Программæ «Земский учитель» фадат дæтты республикæйы районты фæлтæрдджын кадрты фарста алыг кæнынæн. Æвзарæн куыст конкурсы домæнтæм гæсгæ кæй цæуы, уый фæрцы сбæрæг кæнынц æппæтæй курдиатджындæрты.
