Скъолайы бындурон цалцæг къухы бафтыд, бынæттон цæрджытæ республикæйы Сæргълæууæг Битарты Вячеславмæ курдиатимæ куы бацыдысты, уæд
Ацы ахуыры азы райдианæй Уæллаг Бирæгъзæнджы скъоладзаутæ сæ ахуыр райдыдтой ног цалцæггонд кабинетты. Скъолайы бындурон цалцæг къухы бафтыд, бынæттон цæрджытæ республикæйы Сæргълæууæг Битарты Вячеславмæ курдиатимæ куы бацыдысты, уæд. Стыр æмæ ахадгæ куыст бакодтой, фæлæ ма лыггæнинаг фарстатæ баззад. Сæ иу – лæппутæн æмæ чызджытæн физкультурæйы уроктæн фадат кæй нæй, уый. Цæмæн афтæ рауад, æмæ сæм кæд фæзындзæн спортивон зал, уый тыххæй базондзыстут Томайты Батразы сюжетмæ бакæсгæйæ.
Ацы бон æнæхъæн къласæй бæрæг кодтой Боцуаты Богданы гуырæн бон. Сæххæст ыл 10 азы. Зæгъæн ис, æмæ йæ фыццаг юбилей. Цы скъолайы ахуыр кæны, уый та æрæджы сбæрæг кодта йæ цыппæрæм юбилей. 40 азмæ бæстыхай сси бæстон цалцæггæнинаг. Пъолтæ бамбыд сты, йæ сæр дæр ивинаг. Афтæмæй дзы сывæллæтты ахуыр кæнынæн æмбæлгæ уавæртæ нæ уыди. Ныртæккæ та Богдан йе мкъласонтимæ цингæнгæйæ æрбацæуы бындуронæй цалцæггонд скъоламæ.
Бындурон цалцæггæнæн куыстытæ бакæнын бантыст республикæйы разамынды æххуысæй. Алагиры районы цæрджытимæ фембæлды рæстæг 2018-æм азы ахуыргæнæндоны директор æмæ педагогтæ се скъола сцалцæг кæныны тыххæй курдиат бахастой республикæйы сæргълæууæг Битарты Вячеславмæ. 2020-æм азы зонындзинæдты бонмæ уый сæ къухы бафтыд, æмæ ахуырдзаутæ бакъахдзæф кодтой райдзаст æмæ аив кълæстæм.
Ам æххæстæй сног кодтой бæстыхайы æддаг бакаст, баивтой коммуникацитæ, сцалцæг æмæ сифтонг кодтой хæринаггæнæн блок. Кæй зæгъын æй хъæуы, куыстытæ ма дзы бирæ ис. Цалцæггæнинаг ма у физкультурæйы уроктæн бæстыхай. Баскетболæй уал дзы нæ ахъаздзынæ, фæлæ уал сæхи ирхæфсынц шахмæттæй хъазгæйæ. Скъолайы директор зæгъы, се спортивон зал скусдзæн хæстæгдæр рæстæг. Объект хаст æрцыд сæрмагонд федералон программæмæ.
Уымæй дарддæр ма хъæуы спортивон æмæ актон залты сæртæ баивын. Уыцы куыстытæ та фæуынмæ хъавынц ног ахуыры азмæ.
