Архайджыты нымæц афæдзæй-афæдзмæ кæны фылдæр
Ацы аз 17 адæймаджы райдайдзысты Цæгат Ирыстоны хъæуты кусын программæ «Земский работник культуры»-мæ гæсгæ. Архайджыты нымæц афæдзæй-афæдзмæ кæны фылдæр. Фарон проектмæ гæсгæ районты кусын райдыдта 7 адæймаджы. Бадзырды домæнтæм гæсгæ, программæйы архайæг хъуамæ бакуса 5 азы. Алчидæр райсы иурæстæгон фиддон – 1 милуан сомы. Перысаты Максим дæр у программæйы архайæг. Кусы Цыколайы культурæйы хæдзары. Бæлвырддæр радзурдзæн Хъайтмазты Дзерассæ.
Перысаты Максим лæмбынæг кæсы, йæ ахуырдзаутæ дала-фæндырыл куыд арæхсынц, уымæ. Ахсджиаг у мелодийы ритм банкъарын. Цæмæй бæлвырд бамбарын кæна куыд, уый тыххæй йæ къухмæ райста доули. Афтæ кæсы, цыма Максим национ адæмон инструментты тыххæй алцыдæр зоны. Дæсныйæ архайы, нæ фыдæлтæ цы инструменттыл цагъдтой, уыдонимæ. Йæхи музыкалон фæндаг райдыдта нырма æвзонгæй ирон фæндырæй.
Хъæуы культурæйы кусæджы статусы Перысаты Максим ис 6 мæйы. Цыколайы культурæйы хæдзары куыст йæхæдæг равзæрста. Дзæуджыхъæуæй фæндаг хæстæг нæу, фæлæ йæ уый нæ къуылымпы кæны. Сывæллæтты оркестры разамонæгæн рæзгæ фæлтæримæ кусын ног хъуыддаг нæу. Ныр æртыккаг аз национ инструменттыл цæгъдын ахуыр кæны горæты 4-æм гимназы ахуырдзауты дæр. Чибиты æфсымæртæ къуыри 3 хатты æрбацæуынц районы культурæйы хæдзармæ Хæзныдонæй. Æппæт секцитæй æмæ сфæлдыстадон къордтæй равзæрстой национ инструментты оркестр. Дала-фæндырыл цæгъдын мæй ахуыр кæнынц, февралы та коллективы хыгъды архайдзысты сæ фыццаг мадзалы.
Дарддæр сывæллæттæ ахуыр кæндзысты уадындзыл. Æмтгæй райсгæйæ та педагогы фæндты ис, куыд гæнæн ис, афтæ фылдæр национ адæмон инструменттыл аххæссын. Иутæй сæ культурæйы хæдзар сæххæст кодта, цавæрдæртæм та нырма æнхъæлмæ кæсынц. Æмæ Максимы ныхæстæм гæсгæ, уый гæнæнтимæ баст нæу, фæлæ сæ чи цæттæ кæны, ахæм æрмдæснытæ кæй нæ фаг кæны, уыимæ.
Районы культурæйы хæдзары национ инструментты сывæллæтты оркестры разамонæг бирæ рæстæг нæ уыд, уыимæ ацы къабаз та парахат уыд. Программæ «Земский работник культуры»-йы фæрцы фарста лыггонд æрцыд.
Хъæуы культурæйы кусæгæй Максим хъуамæ бакуса 5 азы. Фарон бацыд программæйы фыццаг 7 архайæджы хыгъдмæ. Ацы аз ахæм гæнæн фæуыдзæн ноджыдæр 17 специалистæн. Алчидæр сæ райсдзæн иурæстæгон разæнгардгæнæн фиддон – 1 милуан сомы.
