Уый тыххæй Хицауады æмбырды фехъусын кодта арæзтады æмæ архитектурæйы министр Моргуаты Константин
Ацы аз 9 адæймаджы райсдзысты субсидитæ программæ «Уæрæсейаг бинонтæн цæрæнуат» æххæстгæнгæйæ. Уый тыххæй Хицауады æмбырды фехъусын кодта арæзтады æмæ архитектурæйы министр Моргуаты Константин. Радзырдта ма, цæрæнуæтты арæзтадмæ фæрæзтæ чи бахаста, æмæ сайды чи баззад, уыцы адæмы бартæ баххæст кыныны куысты тыххæй дæр. Æдæппæтæй фарстайаг объектты иугонд реестрмæ кæй бахастой, ахæм бирæфатерон хæдзæрттæ республикæйы ис æхсæз. Тогойы-фырты уынджы 22-æм хæдзар кæронмæ сараздзысты, 18-æм микрорайоны цы объект ис, уымæ гæсгæ та рахастой, адæмæн компенсацитæ бафидыны уынаффæ. 3 бирæуæладзыгон хæдзармæ гæсгæ, арбитражон разамонæг цæттæ кæны, арæзтады архайджыты домæнты реестр æмæ банкроты тыххæй æмбæлгæ гæххæттытæ. Æхсæзæм объектмæ гæсгæ та, тæрхондоны равзæрстыты фæстæ хъуамæ бадзырдтæ хæлд æрцæуой. Цæгат Ирыстоны социалон-экономикон райрæзты хатдзæгты тыххæй ацы азы 6 мæймæ радзырдта экономикон рæзты министр Кучиты Зауыр. Куыд загъта, афтæмæй ахсджиагдæр бæрæггæнæнтæм гæсгæ республикæ æвдисы хорз динамикæ. Иумæйаг бюджеты æфтийæгтæ 6 мæймæ сты 24 æмæ *рдæг миллиард сомы. Уый у 18 проценты фылдæр фаронимæ абаргæйæ. Уыимæ иуæй-иу бæрæггæнæнтæ фæкъаддæр сты. Сæрмагондæй ныхас цæуы экономикæмæ æмæ социалон къабазмæ инвестицитыл. Уый баст у, агропромышленнон комплексы стыр проект æххæстгонд кæй фæцис, стæй ипотекон кредиттæ исыны бæрц кæй фæкъаддæр, уыимæ.
