Цæмæй ахуыргонды ном рох ма уа, уый тыхххæй арæзт æрцыд сæрмагонд Фонд
Ацы аз Абайты Васойы райгуырдыл æххæст кæны 125 азы. Цæмæй ахуыргонды ном рох ма уа, уый тыхххæй арæзт æрцыд сæрмагонд Фонд. Йæ хæс у цалдæр проектыл бакусын: Васойæн цыртдзæвæн сæвæрын, культурон хæзнатæ æмæ ирон æвзаг хъахъхъæнын. Фонды минæвæрттæ зындгонд лигвистæн цыртдзæвæн сæвæрын фæнд кæнынц Дзæуджыхъæуы астæу. Конкурсы хатдзæгтæм гæсгæ æвзæрст æрцыд Цхуырбаты Оледжы куыст. Скульпторæн, специалистты хъуыдымæ гæсгæ, иннæ автортæй хуыздæр рауад ахуыргонды фæлгонц саразын, цыртдзæвæн хорз сфидаудзæн горæты историон хайы. Дзæуджыхъæуы топонимион къамисы уынаффæмæ гæсгæ æвæрд æрцæудзæн Коцойты Арсены номыл уынджы, федералон къазнайы Управленийы бæстыхайы раз. Фонд ма бахаста фæндон, зындгонд ахуыргонды цыртдзæвæнæн фæрæзтæ сæмбырд кæныны тыххæй.
