Уыцы нысантыл схардз кæндзысты сæдæ фæндзай милуан сомы.
Ацы аз æртын фараст бирæуæладзыгон хæдзары скæндзысты бындурон цалцæг — хъусын кæны цæрæнуæтты-коммуналон хæдзарады министрад. Уыцы нысантыл схардз кæндзысты сæдæ фæндзай милуан сомы. Ныртæккæ реигоналон оператор фæцис техникон хæслæвæрдыл куыст æмæ расидтис проектон документаци саразыны конкурс. Уый фæстæ та сбæрæг уыдзысты подрядон куыстуæттæ. Уыцы иу рæстæг бындурон цалцæджы фонд кæны амонæн куыст цæрæнуæтты хицæуттимæ — æвдисы сын проекттæ, стæй æвзарынц бындурон цалцæджы хуыз. Цæрджыты хъæппæристæ та бахæссынц техникон хæслæвæрдмæ. Регионалон операторы минæвæрттæ куыд зæгъынц, афтæмæй цалцæггæнæн куыстыты æмгъуыд бæрæг кæнынц цæрджытæ сæхæдæг. Фиддонтæ æмбæлгæ бæрцæй кæм нæ фидынц, уыцы хæдзæртты цалцæггæнæн куыстытæ сараздзысты фæстæдæр. Закъонмæ гæсгæ та фиддонты æстай процнты чи æрæмбырд кæна, уыцы хæдзары цæрджытæн ис бар бындурон цалцæг æмгъуыдæй раздæр саразынæн. Уæ зæрдыл уын æрлæууын кæндзыстæм — фарон регионалон оператор сцалцæг кодта фæндзай бирæуæладзыгон хæдзары. Куыстытæн бахъуыдис æртæсæдæ милуан сомы.
