Æртыккæгæмы куыстытæ ныридæгæн 90 процентæн æххæстгонд сты
Ацы аз Дзæуджыхъæуы сцалцæг кæндзысты сывæллæтты æртæ поликлиникæйы. Æртыккæгæмы куыстытæ ныридæгæн 90 процентæн æххæстгонд сты. Фыццæгæм æмæ дыккæгæм поликлиникæты та райдайдзысты февралы. Ацы хъуыддаг къухы бафтыд ног национ программæ «Дæргъвæтин æмæ активон цард»-мæ гæсгæ. Бæлвырддæр хабæрттæ радзурдзæн Хъайтмазты Дзерассæ.
Дзæуджыхъæуы сывæллæтты 3-æм поликлиникæйы бындурон цалцæг кæронмæ фæвæййы. Ныридæгæн æххæстгонд сты демонтажон æмæ электротехникон куыстытæ. Сног кодтой бæстыхайы сæр, сæвæрдтой æппæт коммуникацитæ. Баивтой лифтытæ. Æмæ уый æрмæст куыстыты хай у. Объект цæттæ у 90 процентæн. Поликлиникæ лæггад кæны Промышленнон районы 11 мин чысыл цæрæгæн. Цалцæджы рæстæгмæ уал кусæнуат æрбынат кодта Цæгат Кавказы хæххон-металлургон институты дзæбæхгæнæн-профилактикон центры.
Цалцæджы проекты алы лыстæг хъуыддаг дæр хыгъд æрцыд. Дизайныл бакуыстой, цæмæй чысыл пациенттæн зæрдæмæдзæугæ уа, афтæ. Алы кабинетæн дæр хуызтæ сæрмагондæй æвзæрстой. Уавæртæ сарæзтой, йе *нæниздзинад хъыгдард кæмæн у, уыдонæн дæр. Ныридæгæн сæвæрдтой пандус. Поликлиникæйы разамонæджы ныхæстæм гæсгæ, ахсджиаг у алы пациентæн дæр æмбæлгæ уавæртæ скæнын.
Пъланмæ гæсгæ саив кæндзысты поликлиникæйы алыварс территори дæр. Цалцæггонд æртæуæладзыгон бæстыхайы уыдзæн аудиторитæ студенттæн дæр.
Кæд ацы медицинон кусæнуат цæттæ кæны йæ дуæрттæ байгом кæнынмæ, уæд сывæллæтты 1-æм æмæ 2-æм поликлиникæты та бындурон цалцæгмæ хæстæгдæр рæстæг бавналдзысты. 1-æм поликлиникæйы сæйраг дохтыры ныхæстæм гæсгæ, куыстытæ райдайдзысты февралы. Кусæнуат фæлæггад кодта 50 азы æмæ дзы егъау куыстытæ ныр æнæмæнг хъæуынц. Цалцæджы рæстæгмæ поликлиникæйы архайд не *рлæудзæн. Медицинон кусджытæ пациенттæн лæггад кæндзысты Карцайы æмæ Южныйы амбулаториты.
Дыууæ поликлиникæйы бындурон цалцæг пъланмæ гæсгæ фæуыдзæн ацы азы кæронмæ. Куыстытæ æххæстгонд цæуынц национ программæ «Дæргъвæтин æмæ активон цард»-мæ гæсгæ.
