Уый тыххæй фехъусын кодта Дзæуджыхъæуы администрацийы культурæйы управленийы разамонæг Мæрзойты Руслан
Ацы аз горæты бон ацæудзæн æнæ æрвылазон концерт æмæ бæрæгбоны салютæй. Уый баст у, Уæрæсейы цы уавæр ис, уыимæ, стæй сæрмагонд æфсæддон операцийымæ. Уый тыххæй фехъусын кодта Дзæуджыхъæуы администрацийы культурæйы управленийы разамонæг Мæрзойты Руслан. Горæты æмæ республикæйы боны кадæн мадзæлттæ цæудзысты дыууæ боны, 23-æм æмæ 24-æм сентябры. Республикæйы цæрджытæн æмæ уазджытæн бацæттæ кæндзысты лæвар экскурситæ. Стыр æргом аздахдзысты сæрмагонд æфсæддон операцийы чи архайы, уыцы æфсæддонтæн æххуысы мадзæлттæм. Сараздзысты алыхуызон акцитæ, равдыстытæ, стæй бацæттæ кæндзысты æрвитæккæгтæ. Дыууæ боны дæр национ музейы хъуысдзысты ирон камерон музыкæйы зæлтæ. Ацы аз ма фыццаг хатт ацæудзæн грилы фестиваль дæр. Уым та сæ продукци равæрдзысты Дзæуджыхъæуы ресторантæ æмæ кафетæ. Уымæй дарддæр дзы уыдзæни дæсныйадæвдисæг ахуыртæ, музыкалон программæтæ, æмæ афтæ дарддæр. Горæты бирæ бынæтты багом уыдзысты алыхуызон ирхæфсæн фæзтæ. Сабитæн Жуковскийы номыл парчы сараздзысты хъæлдзæг программæ «Страна детства». Терчы былгæрон та ацæудзæни ирон чъириты традицион фестиваль.
