Цæгат Ирыстоны зындгонд хъæбулты номыл республикæйы цæуынц алыхуызон мадзæлттæ. Се сгуыхтдзинæдты æмæ лæгдзинады хабæрттæм хъусгæйæ, рæзгæ фæлтæры фæнды уыдоны хуызæн уæвын.
Ирыстоны легендарон æфсæддон разамонджыты равдыст у тынг цымыдисаг. Советон Цæдисы дыууæ хатты хъæбатыр Плиты Иссæйы хæдзар-музейы ма равæрдтой инæлартæ Мамсыраты Хаджумары æмæ Хетæгкаты Георгийы хи дзаумæттæ, се фсæддон хæрзиуджытæ æмæ майдантæ. Плиты Иссæйы хæрзиуджытæ дæр иууылдæр æмбырдгонд æрцыдысты фыццаг хатт.
Равдыст у юбилейон. Баст у æртæ легендарон æфсæддоны 110 азимæ. Афтæ рауад, æмæ æртæ дæр райгуырдысты иу афæдз. Равдыст гом кæныны мадзалмæ æрбацыдысты хæсты ветерантæ, æфсæддонты хæстæджытæ, скъоладзаутæ. Цæгат Ирыстоны культурæйы æмæ дзыллон коммуникациты министр Хæбæлаты Фатимæ радзырдта хæсты быдыры стыр хъæбатырдзинад чи равдыста, уыдоны сгуыхтдзинæдтæн кад кæнын кæй хъæуы, уый тыххæй. Уый фæстæ равдыстмæ æрбацæуджытæн равдыстой æфсæддон темæйыл концерт.
Музейы алы инæлары тыххæй дæр ис бæлвырд æрмæг. Нæ хъæбатыр æмзæххонты тыххæй дзырдтой историктæ, наукон кусджытæ, сæ хиуæттæ. Уæлдай цымыдисагдæр та уыдысты, Мамсыраты Хаджумар æмæ Хетæгкаты Георгийы цардвæндагæй ист нывтæ. Нырмæ сæ ничи зыдта. Сæрыстыр сæ сты сæ мыггæгты минæвæрттæ дæр.
Мамсыраты Тасолтан: «Хорзæй хорз зæгъын хъæуы. Ацы равдыстмæ цы фæсивæд æрбацыд, уыдонæй æнæмæнгæй сæ зæрдыл бадардзысты, æмæ йæ иннæ фæлтæртæн дæр дзурдзысты».
Равдыст чи бацæттæ кодта, уыдоны хъуыдымæ гæсгæ ацы мадзалæн йæ ахадындзинад афæдзæй афæдзмæ кæндзæн фылдæр. Йæ райгуырæн бæстæйы сæраппонд чи тох кодта, æмæ йæ знагæй чи суæгъд кодта, уыдонæн аргъ кæнын æмæ сæ ма рох кæнын у нæ алкæйы хæс дæр.
