Фæйнæ 250 мин сомы райсгæйæ, сæхи хъуыддаг парахат кæныны фадатæй спайда кодтой 12 адæймаджы
Зæгъын хъæуы уый, æмæ ацы аз райдайгæ амалхъом адæмæн грантты бæрц фæфылдæр кодтой. Фæйнæ 250 мин сомы райсгæйæ, сæхи хъуыддаг парахат кæныны фадатæй спайда кодтой 12 адæймаджы.
Нæлгоймаджы национ хæдæттæ Алинæ хуыйы æрæджыйæ нырмæ. Курсыты ахуырты фæстæ куыста сылгоймаджы дарæсимæ. Фæлæ йæм æнæнхъæлæджы цы заказ бахауди, уый йын йæ куыст аивта. Ирон хæдон адæмы зæрдæмæ куы фæцыди, æмæ йæ агурын куы райдыдтой, уæд сфæнд кодта йæ гæнæнтæ фæуæрæхдæр кæнын. Документтæ балæвæрдта республикæйы экономикон рæзты министрады гранты архайынмæ.
Алинæ фарон райста грант 150000 мин сомы. Балхæдта дзы кусæнгæрзтæ. Нырма уал ателье фæуæрæхдæр кæнын йæ къухы нæ бафтыди, фæлæ къухдæсны йæ куыст нæ уадзы. Сабыргай цæуы йæ бæллицмæ. Уыцы-иу рæстæг министрадæн йæ архайдæн дзуапп дæтты. Уыцы домæн у æнæмæнг грант чи райсы, уымæн. Ахæм уавæрты кусы Темыраты Иринæ дæр. Пряникты аивдзинадыл чызг архайы фæстаг дыууæ азы. Йæ продукци ис бирæ базарадон бынæтты.
Йæ архайдæн кусæнгæрзтæ Иринæ дæр балхæдта гранты фæрæзты фæрцы. Хойраджы нывтæ чи кæны, ахæм принтерæй скæнæн ис, хæрынæн чи бæззы, ахæм цыфæнды аив ныв дæр. Ныртæккæ фылдæр се ргом здахынц ног азы тематикæмæ. Фæлæ кæнынц национ мотивтимæ пряниктæ дæр. Декаратор продукцийыл ныв кæны къухæй. Ног кусæнгæрзтæ сын бирæ фæуæрæхдæр кодта продукцийы рауагъд.
2019-æм азы грантты хицæуттæ систы 19 адæймаджы. Уыдоны сты чысыл æмæ астæуккаг бизнесы минæвæрттæ. Йæ куыстуат сырæзын кæныны тыххæй сæ алчидæр райста фæйнæ 150 мин сомы. Ацы аз чи райста гранттæ, уыдоны нымæц къаддæр у. Сты 12, фæлæ уый хыгъд, фæфылдæр æххуысы бæрц, ныр у 250 мин сомы.
Ахæм æххуыс министрад кæны ныр 3-аг аз. Грантты æппæты фылдæр бæрц у 3 сæдæ мин сомы. Фыццаг 12 мæйы амалхъом адæймаг хъуамæ дзуапп дæтта, куыд сæ пайда кæны, уый тыххæй. Иннæ 2 азы та экономикон рæзты министрад кæндзæн мониторинг. Программæйы архайæг суæвын йæ бон у микробизнесы минæвæрттæн дæр.
