Мысæн изæр арæзт æрцыд йæ райгуырæн Кировыхъæуы – библиотекæйы.
Ацы аз сæххæст 90 азы поэт, фыссæг, публицист Гаджиты Георгийы райгуырдыл. Мысæн изæр арæзт æрцыд йæ райгуырæн Кировыхъæуы – библиотекæйы. Сфæлдыстадон интеллигенцийы минæвæрттæ æмæ скъоладзаутæ сæвæрдтой дидинджытæ фыссæджы цыртдзæвæны цур. Журналисттæ, редактортæ, фысджыты республикон Цæдисы уæнгтæ радзырдтой йæ царды æмæ сфæлдыстады тыххæй. Ирон прозаик æмæ драматург Мамсыраты Дæбе фыццаг раиртæста æрыгон лæппуйы курдиат 48-æм азы. Уый сразæнгард кодта Гаджиты Георгийы Горькийы номыл мæскуйаг литературон институтмæ бацæуынмæ. Каст æй фæцис иттæг хорз бæрæггæнæнтимæ. Йæ дарддæры цардвæндаг Георгий сбаста фысджыты цæдисимæ æмæ редакторы архайдимæ республикон мыхуырон æмæ литературон рауагъдадты. Йе сфæлдыстад парахат уыд республикæйæ дарддæр дæр. Авторы куыстытæ 1954-æм азæй фæстæмæ мыхуыргонд цыдысты Мæскуыйы литературон рауагъдадты. Йæ уацмыстæн уыдис цымыдисаг сюжеттæ. Йæ хъайтартæ тох кодтой сæрибардзинад æмæ рæстдзинадыл.
Козаты Эльбрус, кировыхъæуы цæрæг: «Георгийымæ мах зонгæ уыдыстæм гыццылæй фæстæмæ. Ахуыр кодтам иу скъолайы. Георгий арæх йе *мдзæвгæтæ фыста къулы газеты. Фыдуаг-иу чи кодта, уыдоныл дæр-иу афста æмдзæвгæтæ. Ахæм хъуыддаг дæр хъуыды кæнын. 2 лæппуйы фæхыл сты, æмæ сыл Георгий карикатурæ скодта, æмæ карикатурæйы бын газеты ныффыста: «Хъахъхъæн фæрстæ, хъахъхъæн риу, уый дын фыццаг фындзæн иу». Уымæ гæсгæ хыл кæнын ничиуал уæндыд, Георгий та æмдзæвгæ афысдзæн, зæгъгæ. Уый фæстæ Георгий махмæ фыццаг райста скъолайы сыгъзæрин майдан. Уый хъæуæн дæр, æмæ районæн дæр уыд стыр кад».
