Уæвгæ та, æмтгæй райсгæйæ, республикæйы ахуыргæнæндæтты къæсæрæй бакъахдзæф кæндзæн 86 мин скъоладзауы
Ацы аз Цæгат Ирыстоны скъолаты партæты уæлхъус æрбаддзысты 9 мин фыццæгæмкъласонæй фылдæр. Уæвгæ та, æмтгæй райсгæйæ, республикæйы ахуыргæнæндæтты къæсæрæй бакъахдзæф кæндзæн 86 мин скъоладзауы. Фыццагкъласонты нымæц ацы аз фаронимæ абаргæйæ у зынгæ фылдæр. 2018-æм аз уыдысты мин сывæллоны къаддæр. «Сæрмагонд ведомствæты статистикæмæ гæсгæ, фæстаг азты фыццагкъласонты нымæц кæны фылдæрæй-фылдæр, ацы аз дæр нырма кæронбæттæн бæрæггæнæн нæу, уымæн æмæ исæн кампани нырма нæ фæци», загъта ахуырад æмæ наукæйы министр. Людмила Башарина куыд фехъусын кодта, афтæмæй ног ахуыры азмæ бацæттæ кæныны тыххæй стыр æмæ ахадгæ куыст бакодтой. Ацы аз ацы хъуыддæгтæн дихгонд æрцыди 92 милуан сомы. Уымæй уæлдай, ныридæгæн скъолатæ райстой ног ахуыргæнæн æрмæг дæр. Ахуыргæнæндæтты курдиæттæ æххæстгонд æрцыдысты 100%. Уæ зæрдыл уын æй лæууын кæнæм, зонындзинæдты боны кадæн кадджын линейкæтæ Цæгат Ирыстоны ацæудзысты 4-æм сентябры. Зонындзинæдты бон фæстæдæрмæ ахæссыны уынаффæ хаст æрцыди , теракты хъыгдардбаййафджыты, æхсæнадон организациты æмæ республикæйы цæрджыты хъуыдытæ æмæ фæндонмæ хынцгæйæ.
