13æм-14-æм сентябры республикæйы 5 районы уыдзæн бынæттон хиуынаффæйады оргæнтæм æвзæрстытæ
Ацы аз Цæгат Ирыстоны традицион хуызы схъæлæс кæнынæй фæстæмæ ма фыццаг хатт уыдзæн дистанцион электрон хуызы схъæлæс кæныны фадат дæр. 13æм-14-æм сентябры республикæйы 5 районы уыдзæн бынæттон хиуынаффæйады оргæнтæм æвзæрстытæ. Электрон хуызы схъæлæс кæнын у алкæйы бон дæр. Курдиат бадæттæн ис паддзахадон лæггæдты порталы. Бæлвырддæр радзурдзæн Хъайтмазты Дзерассæ
Архонкæйы цæрæг Сопойты Валерия сфæнд кодта йæ конституцион барæй нымæцон технологиты фæрцы спайда кæнын. Хъæуы администрацийы сæргълæууæджы æвзардзæн дистанцион хуызы. Валерия ныридæгæн ныууагъта курдиат «Паддзахадон лæггæдты» порталы. Уайтагъд æм æрбацыд дзуапп – электрон бюллетень цæттæ у. Сентябры йæ бон суыдзæн схъæлæс кæнын дистанцион электрон хуызы.
Дистанцион электрон хуызы хъæлæс кæныны фæрцы адæмæн сæ кандидатыл схъæлæс кæнын уыдзæн бæстæйы цавæрфæнды регионыуæвгæйæ дæр. Цæгат Ирыстоны бынæттон хиуынаффæйады оргæнтæм æвзæрстытæ уыдзысты 13-æм æмæ 14-æм сентябры. Уыцы бонты республикæйы кусдзæн 12 æвзарæн къамисы. Цæгат Ирыстоны цæрджыты хъæудзæн равзарын 6 хъæуы сæргълæууæджы. Уæлæмхасæнæй ма равзардзысты Черменыхъæуы æмæ Хуымæллæджы минæвæртты æмбырдты депутатты. Ацы аз республикæйы цæрджытæн дистанцион хуызы схъæлæс кæнын сæ бон фыццаг суыдзæн.
Ацы процедурæ сæхæхст кæнынæн курдиæттæ исыны рæстæг райдыдта 29-æм июны. Фæуыдзæн – æвзæрстыты райдианæй 3 боны раздæр. Ныридæгæн курдиæттæ балæвæрдтой 700 адæймаджы.
Дистанцион электрон хуызы хъæлæс кæнын у ацы æвзæрстыты сæйраг ногдзинад. Моргуаты Жаннæйы ныхæстæм гæсгæ, абон æвзарæн процессы нымæцон хуыз у Цæгат Ирыстоны æвзарæн къамисы куысты ахадгæдæр къабæзтæй иу.
